موروفين

#٢٠٣٠_بلا_نقاب27 أنا هيام سعودية قبلية من الشرقية وأفتخر بأصلي وانتمائي للسعوديه وتراثها وأعتز بديني ووطني وقيادتي وطنيتي وديني مو مجال للمزايدات ولا أقبل إن أحد يشكك فيهم لمجرد إني طالبت بحقي في الاختيار وقصتي مع النقاب بدأت من كان عمر ١١ سنة واستمرت لين وصلت ٢٠ تسع سنوات من عمري وأنا ألبسه مو بكامل إرادتي! بس عشان ضغط المجتمع وكلام الأقارب كانوا يتلفظون على أبوي ويوصفونه بالقاب لأنه ما كان ينقبني وكأن رجولة الأب تنقاس بقدرته على فرض النقاب على بنته! وكانو ينبذوني وانا طفله ومايسحمون لي اختلط مع بناتهم بحجة اني بلعب بعقولهم ويفرضون وصايتهم وكأن البنت لازم تتحمل نتيجة أحكام الناس عشان أبوها ما يتعرض للإهانة وكنت احترم ابوي فعلاً كأي بنت ولا ارضى له الاهانه ولما انتقلنا للخبر تغير الوضع واختفت الوصاية الاجتماعية اللي كنت أعيش تحتها ووقفت الألفاظ اللي كانت تنقال عن أبوي وصار عادي عنده إني أختار بنفسي والحين اقول إن أحيانًا اللي يقيد المرأة مو النظام ولا الدين بل نظرة المجتمع والضغط اللي يمارسه على أهلها لين يحسّسهم إنهم مقصرين إذا ما فرضوا عليها اختياراته أنا ما أتكلم عن قصة سمعتها من أحد أنا أتكلم عن تسع سنوات من حياتي عشتها بنفسي تسع سنوات كانت مفروض تكون سنوات طفولتي ومراهقتي وأعرف وش يعني إن قرار يخصني يتحول إلى سبب لإهانة أبوي والطعن في رجولته وأعرف كيف ممكن كلام الأقارب يتحكم في حياة عائلة كاملة وأبي أوضح اني ما أتكلم ضد النقاب ولا ضد أي امرأة تختاره عن قناعة من حقها تلبسه وتعتز فيه لكن مو من حق أحد يفرضه على غيرها ولا من حقه يشكك في دين المرأة أو أخلاقها أو رجولة أبوها إذا اختارت غيره من اللباس المحتشم مسألة تغطية الوجه فيها خلاف فقهي معروف ومن حقنا نختار بعيدًا عن التشديد والتخويف وبعيدًا عن تحويل النقاب إلى مقياس للإيمان والصلاح وان نحترم الاراء والقناعات ونناقش السؤال نفسه بدون مانهجم وارجع اعيدها محد يساومني على وطنيتي أو ديني وماأحتاج أثبت انتمائي لأحد بغطاء وجه ولا أقبل إن أحد ينصّب نفسه حكم على إيماني بسبب لباسي محبتي للسعودية ما تعني إني أسكت عن تجربة عشتها ولا تعني إني ما أقدر أطالب بتغيير شيء أعتقد إنه يضرني ويضر غيري أنا أقدر أعتز بوطني وأتكلم عن مشاكلي في نفس الوقت لأن المطالبة بالحل مو خيانة والاختلاف مو دليل على قلة الدين أو الوطنية أنا مابي اشوف اي بنت تكون مجبوره تختار بين اهلها او قناعتها ولا أبي أشوف رجال عائلتي يتعرضون للإهانة بسبب قرار يخصني ما أبي بنت ثانية تعيش نفس التجربة وتنجبر تلبس شيء خوفًا على سمعة أبوها بدل ما تختاره عن قناعة وماابي اطفالنا يتحملون ضغط اجتماعي اكبر من عمرهم من حق اي طفله انها تعيش ببيئه تحترم اختيارها نبي مجتمعًا يحترم المرأةاللي تختار اللباس المحتشم بدون تجريح ولا تشكيك ولا وصاية وأنا أتكلم بصفتي سعودية وأبي صوت المرأة السعودية ينسمع في وطنها وأتمنى نشوف معالجة لهالمشكلة من داخل دولتنا ومجتمعنا مثل ما تعودنا إن التغيير يبدأ من فهم احتياجات الناس والاستماع لهم ما أبي أحد يستغل قصتي لأجندة ما تمثلني ولا أبي أحد يتكلم باسمي أنا أعرف وش عشت وأعرف وش أطالب فيه