Peter Msigwa

USIPIME THAMANI YAKO KWA KASI YA MAFANIKIO YA WENGINE Rev peter Simon Msigwa Kuna kijana wa miaka 25 tayari ana biashara. Mwingine wa miaka 30 bado anatafuta ajira. Mwingine wa miaka 35 ndiyo anagundua kipaji chake. Mwingine wa miaka 40 ndiyo anaanza taaluma mpya. Usiruhusu mafanikio ya mtu mwingine yakuaminishe kwamba muda wako umekwisha. Mitandao ya kijamii inakuonesha magari ya watu, nyumba zao, safari zao na mafanikio yao, lakini mara nyingi haikuoneshi madeni yao, changamoto zao, makosa yao na miaka waliyotumia kujenga walichonacho. Usilinganishe ukurasa wa kwanza wa safari yako na ukurasa wa ishirini wa safari ya mtu mwingine. Kuna watu wanaanza mapema na kufanikiwa baadaye. Kuna wanaoanza kuchelewa na kufanya mambo makubwa. Na kuna wanaobadili mwelekeo mara nyingi kabla ya kupata eneo linalolingana na uwezo wao. Kuchelewa kufika si sawa na kushindwa kufika. Na kuanza upya si sawa na kurudi nyuma.

MAHAKAMA YA UMMA NA MAHAKAMA YA DHAMIRI- kwa rafiki yangu Godbless Lema. Rev Peter Simon Msigwa Ndugu na rafiki yangu Lema, baada ya kuzungumza na vyombo vya habari, ninaona sasa umesimama mbele ya mahakama mbili muhimu sana katika maisha ya mwanadamu: Mahakama ya Umma na Mahakama ya Dhamiri. Kwa maoni yangu, ulijielekeza vibaya. Huenda ulikuwa na nia njema ya kueleza msimamo wako, lakini wakati mwingine namna tunavyojieleza inaweza kuleta maswali mengi zaidi kuliko majibu tuliyokusudia kutoa. Mahakama ya Umma ni nini? Hii ni mahakama isiyo na jengo, majaji wala waendesha mashtaka. Ni mahakama ambayo wananchi wanapima maneno yako, matendo yako, misimamo yako na uaminifu wako kwa kuzingatia kile wanachokifahamu kuhusu wewe. Katika mahakama hii, si wewe pekee unayeamua namna utakavyoeleweka. Watu wanaweza kulinganisha ulichosema jana na unachosema leo. Wanaweza kuhoji tofauti kati ya maneno yako na matendo yako. Hata hivyo, hukumu ya umma si lazima iwe sahihi kila wakati. Ndiyo maana ukweli na haki vinapaswa kuwa juu ya hisia na mitazamo ya watu. Mahakama ya Dhamiri ni nini? Hii ni mahakama iliyo ndani ya mwanadamu mwenyewe. Haina majaji wanaoonekana, haina waandishi wa habari, haina mashabiki wala wapinzani. Ni mahakama ambayo wewe mwenyewe unakutana na ukweli unaoujua ndani yako. Unaweza kuwashawishi watu kwamba uko sahihi, lakini dhamiri yako ikawa na maswali ambayo hujayajibu. Unaweza kushinda mabishano mbele ya umma, lakini ukashindwa kupata amani ndani yako. Mahakama ya Umma inakuuliza: Watu wanayaonaje maneno na matendo yako? Mahakama ya Dhamiri inakuuliza: Wewe mwenyewe unajua nini kuhusu ukweli wa maneno na matendo yako? Ndugu yangu Lema, kama rafiki yako, siwezi kujifanya ninajua kilicho ndani ya dhamiri yako. Hilo unalijua wewe mwenyewe na Mungu wako. Lakini ninaweza kukuambia kwa upendo na uwazi kwamba, kwa mtazamo wangu, ulijielekeza vibaya. Urafiki wa kweli si kushangilia kila anachofanya rafiki yako. Wakati mwingine ni kuwa na ujasiri wa kumwambia ukweli hata pale ambapo ukweli huo unaweza kumuumiza. Ninakuombea kwa Mungu akupe hekima, utulivu, unyenyekevu na ujasiri wa kujitathmini. Kumbuka, si kila anayekukosoa ni adui yako, na si kila anayekushangilia ni rafiki yako. Wakati mwingine tunatumia nguvu nyingi kujitetea mbele ya watu, lakini tunasahau umuhimu wa kujitathmini mbele ya dhamiri zetu. Unaweza kujitetea mbele ya Mahakama ya Umma kwa maneno, lakini mbele ya Mahakama ya Dhamiri unapaswa kukutana na ukweli. Ndugu yangu Lema, ninamwomba Mungu akusaidie. Kwa sababu mwisho wa yote, si muhimu tu watu waseme nini kuhusu wewe; ni muhimu pia wewe mwenyewe uweze kuishi kwa amani na ukweli unaoujua. Mahakama ya Umma inaweza kukosea katika hukumu yake, lakini Mahakama ya Dhamiri inayosikiliza ukweli kwa uaminifu inaweza kuwa mahali pa mwanzo wa kujisahihisha.

SIMAMA, UHESABIWE — USIWE KATIKATI! Rev Peter Simon Msigwa Kwa wanasiasa na wanaharakati wa Tanzania. Mambo ni mawili, wala si matatu! Ama usimame upande wa watekaji, wauaji na wakandamizaji, Au usimame upande wa haki, uhuru, demokrasia na maendeleo. USIWE KATIKATI! Maana kuna nyakati ukimya ni sauti, Kuna nyakati kutokuchagua ni kuchagua, Na kuna nyakati kusimama katikati ni kusimama upande wa mwenye nguvu dhidi ya asiye na nguvu. SIMAMA, UHESABIWE! Usisubiri upepo ubadilike ndipo utandike tanga. Usisubiri jua lichomoze ndipo ukiri kuwa usiku ulikuwa na giza. Usisubiri minyororo ikatike ndipo ujitangaze kuwa ulipenda uhuru. Usisubiri wengine walipe gharama ya mapambano ndipo wewe ujitokeze kudai sehemu ya ushindi. Na hili ulitie moyoni, ulitie akilini, ulitie katika kumbukumbu zako: MABADILIKO TANZANIA YATATOKEA! Ukiwa pamoja nayo, yatatokea. Ukiwa kinyume nayo, yatatokea. Ukiwa kimya, yatatokea. Ukiwa mbele, yatatokea. Ukiwa nyuma, yatatokea. NA WEWE AU BILA WEWE, LAZIMA YATOKEE! Unaweza kuchelewesha mapambazuko, lakini huwezi kulizuia jua kuchomoza. Unaweza kuzuia mto kwa muda, lakini huwezi kuyaamuru maji yaache kutafuta njia. Unaweza kuwakandamiza watu, lakini huwezi kuizika milele kiu yao ya haki na uhuru. Na siku historia itakapofungua kurasa zake, haitauliza ulikuwa na cheo gani, ulikuwa karibu na nani, au ulikuwa na mali kiasi gani. Itauliza ulisimama wapi wakati watu walipokuwa wakidai haki zao. Itauliza ulisema nini wakati wengine waliponyamazishwa. Itauliza ulifanya nini wakati kusimama upande wa haki kulipokuwa na gharama. KUMBUKA: HISTORIA HAIANDIKWI TU NA WALE WALIOSHINDA, BALI PIA NA WALE WALIOKUWA NA UJASIRI WA KUSIMAMA WAKATI WENGINE WALIPOCHAGUA KUNYAMAZA. SIMAMA, UHESABIWE! MAANA MABADILIKO YATATOKEA, NA WEWE AU BILA WEWE

“Taifa haliwezi kujengwa kwa hofu. Haliwezi kujengwa kwa ukimya wa wanaofikiri tofauti. Haliwezi kujengwa kwa kushinda hoja kwa nguvu badala ya nguvu ya hoja. Serikali yenye kujiamini hufungua milango ya mazungumzo; haifungi milango ya siasa. Taifa lenye nguvu si lile lisilo na wakosoaji, bali ni lile linaloweza kuwasikiliza wakosoaji wake bila kupoteza utulivu wake. Tanzania imekuwa kubwa kwa busara zake kuliko kwa nguvu zake. Ni wakati wa kurejea kwenye urithi huo.”

Sababu saba zinazotufanya tumwone Yesu kama mwanaharakati Rev Msigwa 1. Yesu alipinga matumizi mabaya ya mamlaka. Katika Mathayo 23:4, Yesu aliwakemea viongozi wa dini waliowatwika watu mizigo mizito ambayo wao wenyewe hawakuwa tayari kuibeba. Hapa Yesu anatufundisha kwamba mamlaka hayapaswi kutumika kuwatesa watu, bali kuwahudumia. 1. Yesu alisimama upande wa waliotengwa na jamii. Katika Luka 4:18–19, Yesu alitangaza kusudi la huduma yake: "Roho wa Bwana yu juu yangu, kwa maana amenitia mafuta kuwahubiri maskini habari njema..." Alizungumzia uhuru kwa wafungwa, kuona kwa vipofu na kuwaacha huru waliosetwa. Hii ilikuwa zaidi ya ujumbe wa faraja binafsi. Ilikuwa tangazo la ukombozi wa kiroho lenye athari za kijamii. 1. Yesu hakunyamaza mbele ya unafiki wa viongozi. Katika Mathayo 23:27, aliwafananisha baadhi ya viongozi wa dini na makaburi yaliyopakwa chokaa, yanayoonekana mazuri kwa nje lakini ndani yamejaa uchafu. Yesu hakufundisha kwamba kumheshimu kiongozi kunamaanisha kutokukosoa matendo yake. 1. Yesu alipinga mifumo iliyoweka taratibu juu ya utu wa mwanadamu. Katika Marko 2:27 alisema: "Sabato ilifanyika kwa ajili ya mwanadamu, si mwanadamu kwa ajili ya sabato." Hii ni kanuni yenye nguvu sana: taratibu zinapaswa kumhudumia mwanadamu, si kumfanya mwanadamu kuwa mtumwa wa taratibu. 1. Yesu alikabiliana na matumizi mabaya ya dini kwa masilahi binafsi. Katika Mathayo 21:12–13, Yesu aliwafukuza waliokuwa wakifanya biashara hekaluni na kukemea kugeuzwa kwa nyumba ya sala kuwa pango la wanyang'anyi. Hakubaki kimya kwa kisingizio cha kulinda heshima ya taasisi ya dini. 1. Yesu alifundisha kwamba uongozi ni utumishi, si ubwana. Katika Marko 10:42–45, Yesu alitofautisha namna watawala wanavyotumia mamlaka na namna wanafunzi wake wanavyopaswa kuongoza. Alisema mwenye kutaka kuwa mkubwa lazima awe mtumishi. Kwa hiyo, kwa Yesu, ukubwa wa kiongozi haupimwi kwa uwezo wake wa kutawala watu, bali kwa kiwango anachowatumikia. 1. Yesu alikuwa tayari kulipa gharama ya kusimamia ukweli. Katika Yohana 18:37, mbele ya Pilato, Yesu alisema alikuja ulimwenguni kuushuhudia ukweli. Hakuuacha utume wake kwa sababu ya vitisho, kukataliwa au uwezekano wa kuuawa. Changamoto kwa Kanisa la leo Hapa ndipo tunapopaswa kujiuliza maswali magumu. Ikiwa Yesu alikemea unafiki wa viongozi, kwa nini Kanisa liogope kukemea unafiki wa wenye mamlaka? Ikiwa Yesu alisimama na waliotengwa, kwa nini Kanisa lisimame na wenye nguvu pekee? Ikiwa Yesu alitangaza uhuru kwa waliosetwa, kwa nini Kanisa lionee aibu kuzungumzia haki za wanaokandamizwa? Na ikiwa Yesu alifundisha kwamba ukweli humweka mwanadamu huru, kwa nini kusema ukweli mbele ya mamlaka kuonekane kuwa kosa? Kanisa halihitaji kuwa chama cha siasa ili kutetea haki. Na mchungaji hahitaji kuwa mwanasiasa ili kukemea uovu. Lakini pia Kanisa linapaswa kupima kila harakati kwa misingi ya ukweli, upendo, haki na kutokufanya ukatili, badala ya kuunga mkono kila jambo linaloitwa harakati. Hitimisho langu la kiteolojia ni hili: Yesu hakuwa mwanaharakati aliyekuwa anatafuta madaraka. Alikuwa Mfalme aliyekataa kutumia mamlaka kwa namna ya watawala wa dunia. Hakupigania kiti cha Kaisari, lakini alifundisha ukweli uliotia changamoto namna mamlaka yalivyotumiwa. Hakutafuta kuanzisha serikali ya kisiasa, lakini alitangaza Ufalme wa Mungu unaodai haki, rehema na uaminifu. Swali kubwa si kama Yesu alikuwa mwanaharakati. Swali kubwa ni hili: Je, Kanisa la leo lina ujasiri wa kusimamia ukweli na haki kama Yesu alivyofanya, hata pale ambapo kufanya hivyo kuna gharama?

KUNA WATU HAWAELEWI MUNGU ANAPOWAKATAZA! Hesabu 22:21–35 — Habari za Balaamu na punda wake. Katika habari za nabii Balaamu, kuna jambo la kutafakari sana. Balaamu alikuwa nabii, lakini tamaa na maslahi yake vilianza kumfanya ashindwe kutambua mapenzi ya Mungu. Mungu alipoweka malaika njiani kumzuia, Balaamu hakuweza kumwona. Lakini punda wake alimwona malaika na kujaribu kukwepa hatari. Badala ya Balaamu kutafakari kwa nini punda anakataa kuendelea na safari, alianza kumpiga. Alimpiga mara ya kwanza, ya pili na ya tatu, mpaka Mungu akafungua kinywa cha punda na punda akaongea! Fikiria hili: Nabii aliyepaswa kuona mambo ya rohoni alikuwa kipofu, lakini punda aliyedhaniwa kuwa hana ufahamu alikuwa anaona hatari mbele yake. Kuna watu wako hivyo hata leo. Mungu anawazuia, lakini wao wanadhani wanacheleweshwa. Mungu anawafungia mlango, wao wanadhani wanahujumiwa. Mungu anawatumia watu kuwaonya, wao wanadhani wanapingwa. Mungu anawazuia wasiendelee na njia ya uharibifu, wao wanatumia nguvu, mamlaka na ushawishi kuhakikisha wanaendelea. Balaamu hakuelewa kwamba punda aliyekuwa anampiga ndiye aliyekuwa anamwokoa. Na hapa kuna somo kubwa sana: Si kila anayekuzuia ni adui yako. Wakati mwingine anayekuzuia ndiye anayeona hatari ambayo wewe huioni. Kuna watu wamefikia mahali ambapo hawasikii tena ushauri, hawakubali kuonywa, hawataki kukosolewa. Kila anayewaambia ukweli wanamwona kuwa adui. Wanapiga kila punda anayekataa kuwapeleka kwenye uharibifu! Lakini kumbuka jambo moja: Mungu aliposhindwa kupata usikivu wa nabii, alifungua kinywa cha punda. Hii inatufundisha kwamba Mungu anaweza kutumia hata mtu unayemdharau kukuambia ukweli ambao hutaki kuusikia. Usiwe Balaamu wa kizazi hiki: mwenye cheo lakini asiyeona, mwenye mamlaka lakini asiyesikia, mwenye nguvu ya kuadhibu wengine lakini asiye na hekima ya kutambua kwamba yeye mwenyewe ndiye anayehitaji kurekebishwa. Na mwisho, usisahau: Balaamu alikuwa anampiga punda kwa sababu punda alikataa kuendelea na safari. Kumbe punda alikuwa anakataa kwa sababu mbele kulikuwa na upanga! Wakati mwingine Mungu hakuzuii kwa sababu anakuchukia. Anakuzuia kwa sababu anaona mwisho wa njia ambayo wewe una hamu sana ya kuipita. Swali la kutafakari: Je, inawezekana kwamba watu unaowapiga vita leo kwa sababu wanakukosoa ndio watu ambao Mungu anawatumia kukuokoa na maangamizi ya kesho?

SALAMU ZA POLE KWA MHESHIMIWA TUNDU ANTIPAS LISSU KUFUATIA KIFO CHA KAKA YAKE, MAREHEMU WAKILI ALUTE Ndugu yangu Mheshimiwa Tundu Antipas Lissu, Kwa huzuni na masikitiko makubwa, nimepokea taarifa za kuondokewa na kaka yako mpendwa, marehemu Wakili Alute. Napenda kukufikishia salamu zangu za dhati za pole na rambirambi, wewe pamoja na familia nzima, ndugu, jamaa na wote walioguswa na msiba huu. Kuondokewa na kaka ni pigo kubwa katika maisha ya familia. Ni kumpoteza mtu mliyeshiriki naye historia, malezi, upendo na kumbukumbu nyingi za maisha. Hakika, pengo analoliacha marehemu haliwezi kuzibika kwa urahisi. Ndugu yangu Lissu, msiba huu umekukuta katika kipindi chenye changamoto nyingi. Ninatambua kuwa katika mazingira kama haya, uchungu wa kufiwa unaweza kuwa mzito zaidi. Ninakuombea Mungu akupe nguvu, uvumilivu na faraja ya kustahimili majonzi haya. Maandiko Matakatifu yanatukumbusha: “BWANA yu karibu nao waliovunjika moyo, na waliopondeka roho huwaokoa.” — Zaburi 34:18. Katika wakati huu wa kuomboleza, tunamshukuru Mungu kwa maisha ya marehemu Wakili Alute na kwa kumbukumbu alizoacha kwa familia na wote waliomfahamu. Mwenyezi Mungu ailaze roho ya marehemu mahali pema peponi, awafariji wafiwa wote na kuwajalia moyo wa subira na amani. Poleni sana kwa msiba huu mzito. Tupo pamoja nanyi katika majonzi na sala. Kwa heshima na masikitiko makubwa, Rev. Peter Simon Msigwa

Kioo

NO MATTER HOW HIGH YOU FLY, ONE DAY YOU WILL LAND! Rev Peter Simon Msigwa “Ujapopanda juu kama tai, ijapokuwa kioto chako kimewekwa kati ya nyota, nitakushusha kutoka huko, asema BWANA.” — Obadia 1:4 Kuna jambo moja ambalo wenye madaraka, mali, vyeo na umaarufu wanapaswa kulikumbuka: Hakuna nafasi ya milele, hakuna cheo cha milele, na hakuna mwanadamu aliye juu ya mabadiliko ya maisha. Tatizo la baadhi ya watu si kupata madaraka au utajiri. Tatizo ni pale madaraka na utajiri vinapowafanya wasahau kwamba wao pia ni binadamu kama wengine. Wanaanza kuwadharau walioko chini yao, kuwapuuza wanaowakosoa na kuamini kwamba nafasi walizonazo leo zitadumu milele. Lakini kuna ukweli ambao hakuna mwenye mamlaka anayeweza kuukwepa: No matter how high you fly, one day you will land! Haijalishi umepaa juu kiasi gani, siku moja utalazimika kutua. No matter how big or luxurious the car you drive, one day you will step out of it! Haijalishi gari unaloendesha ni kubwa na la kifahari kiasi gani, siku moja utalishuka. No matter how big your house is, one day you will leave it! Haijalishi jumba unaloishi ni kubwa kiasi gani, siku moja utalicha. No matter how powerful your title is, one day you will surrender it! Haijalishi cheo chako kina nguvu kiasi gani, siku moja utakikabidhi kwa mwingine. Na haijalishi leo una walinzi wangapi, siku moja unaweza kutembea bila msafara. Haijalishi leo watu wangapi wanasimama unapopita, siku moja unaweza kupita bila hata mtu kukutambua. Haijalishi leo watu wangapi wanakupigia makofi, siku moja makofi hayo yatanyamaza. Ndiyo maana usiruhusu ukubwa wa nafasi yako ukafanye ujione mkubwa kuliko wengine. Usichanganye kuogopwa na kuheshimiwa. Usichanganye kunyamaziwa na kukubaliwa. Usichanganye kuwa na mamlaka na kuwa juu ya sheria. Na zaidi ya yote, usichanganye watu wanaokupigia makofi kwa sababu ya cheo chako na watu wanaokuheshimu kwa sababu ya utu wako. Kumbuka: Cheo kinakupa mamlaka, lakini tabia yako ndiyo inayokupa heshima. Mali inaweza kukupa maisha ya kifahari, lakini haiwezi kukununulia dhamiri safi. Madaraka yanaweza kuwafanya watu wakusikilize, lakini hayawezi kuwalazimisha wakupende. Leo unaweza kuwa juu kiasi kwamba sauti za watu wa chini hazikufikii. Lakini siku moja utarudi katika jamii hiyo hiyo ambayo leo unaiona iko chini yako. Na siku hiyo, watu hawatakuuliza ulikuwa na walinzi wangapi, magari mangapi, majumba mangapi au cheo kikubwa kiasi gani. Watakumbuka jinsi ulivyowatendea ulipokuwa na nafasi ya kuwasaidia au kuwaumiza. Kwa hiyo, ukiwa juu, usiwadharau walio chini. Ukiwa na nguvu, usiwanyanyase wasio na nguvu. Ukiwa na mamlaka, usitumie mamlaka hayo kuwavunjia wengine utu wao. Kwa sababu kuna tofauti kubwa kati ya kuondoka madarakani ukiwa umeacha heshima na kuondoka madarakani huku watu wakisherehekea kuondoka kwako. THE HIGHER YOU FLY, THE MORE HUMBLE YOU SHOULD BE. BECAUSE NO MATTER HOW HIGH YOU FLY, ONE DAY YOU MUST LAND! Na siku hiyo ikifika, swali halitakuwa ulipaa juu kiasi gani, bali uliwatendeaje wale waliokuwa chini yako? “Kiburi cha moyo wako kimekudanganya.” — Obadia 1:3

MAZUNGUMZO! Rev Peter Simon Msigwa 27/10/26 Kwa nini mtu anayejiona kuwa mhanga wa mfumo fulani anaweza kufikia hatua ya kuamini kwamba yeye ndiye anayepaswa kuomba msamaha, kujishusha na kupiga magoti mbele ya mfumo anaoulalamikia? Hili si swali dogo. Ni swali linalohusu saikolojia ya ukandamizaji, hofu na namna watu wanavyoweza kuzoea mazingira ya kunyimwa haki kiasi cha kuanza kuona haki zao kama hisani ya wenye mamlaka. Ninawasikia baadhi ya wanachama wa CHADEMA wakisema kwamba chama kinapaswa kujishusha mbele ya watawala ili kuwe na maridhiano. Nina swali moja: Kujishusha kwa sababu gani? Kuomba msamaha kwa kosa gani? Na kuomba huruma ili tupewe haki gani ambayo Katiba haijatambua? Kuna tofauti kubwa kati ya kauli hizi mbili: “Tuzungumze ili kutatua mgogoro.” Na “Tujishushe ili wenye mamlaka watuhurumie.” Ya kwanza ni njia ya kutafuta suluhu yenye kuheshimiana. Ya pili inaweza ni dalili ya watu kuanza kukubali kwamba haki zao zinategemea utashi wa wenye mamlaka. Katika saikolojia kuna dhana inayoitwa Learned Helplessness, hali ambayo mtu aliyekabiliwa na vikwazo kwa muda mrefu anaweza kuanza kuamini kwamba hana uwezo wa kubadili mazingira yake. Badala ya kuhoji anayemnyima haki, anaanza kujihoji mwenyewe. Badala ya kudai sheria iheshimiwe, anaanza kutafuta namna ya kumfurahisha mwenye mamlaka. Wengine wanaweza kulinganisha hali hii na Stockholm Syndrome, ingawa hiyo ni tashbihi tu, si utambuzi wa kitabibu kwa watu wenye maoni tofauti ya kisiasa. Lakini tusichanganye mambo. Mazungumzo si udhaifu. Maridhiano si usaliti. Na msimamo thabiti si uadui dhidi ya amani. Swali ni: Tunafanya mazungumzo juu ya msingi gani? Je, tunataka haki za kikatiba zitekelezwe, au tunataka kupewa ruhusa ya kuzifurahia? Je, tunataka sheria itawale, au tunataka huruma ya watawala ichukue nafasi ya sheria? Je, tunataka maridhiano yanayoshughulikia chanzo cha mgogoro, au maridhiano yanayofunika dalili zake na kuacha chanzo kilekile? Haki inayotegemea huruma ya mwenye mamlaka si haki iliyohakikishwa. Ni fadhila inayoweza kuondolewa wakati wowote. Ndiyo maana ninawauliza wenzangu wanaotaka CHADEMA iombe maridhiano: Je, mnataka mazungumzo yatakayohakikisha haki zinalindwa, au mnataka chama kikubali masharti ya watawala ili tu kiweze kufanya siasa? Hatuwezi kujenga taifa la haki ikiwa kila anayelalamikia kunyimwa haki anaambiwa yeye ndiye mwenye wajibu wa kujishusha kwanza. Wajibu wa serikali si kusubiri wananchi waombe huruma. Wajibu wake ni kuheshimu Katiba, kutekeleza sheria kwa usawa na kulinda haki za wote, wakiwemo wanaoikosoa. Tunaweza kukaa mezani bila kupiga magoti. Tunaweza kutafuta amani bila kuuza haki. Tunaweza kukubali mazungumzo bila kukubali kwamba aliyenyimwa haki ndiye mwenye hatia. Maridhiano ya kweli hayapimwi kwa kiwango ambacho upande mmoja umejishusha, bali kwa kiwango ambacho pande zinazohusika zimekubaliana kurejesha haki, kujenga uaminifu na kuzuia makosa yasijirudie. Tusifundishe kizazi chetu kwamba ili upate haki lazima kwanza umpendeze anayeshikilia mamlaka. Tuwafundishe kwamba mamlaka yenyewe yanapaswa kutii Katiba. HATUHITAJI HURUMA ILI TUWE NA HAKI. TUNAHITAJI KATIBA NA SHERIA ZIHESHIMIWE.

Kuwa Enzi wapendwa wetu 29/10/25.

Kuwa enzi wapendwa wetu 29/10/25.

“Huwezi kumwaibisha mtu kwa historia ambayo tayari ameikubali. Aibu inawastahili wale wanaotambua kosa lakini wanaendelea kulitetea.”

Hongera karatu

JIBUNI HOJA ZANGU, SI HISTORIA YANGU! Na Rev. Peter Simon Msigwa Hoja zangu ziko wazi kabisa, na sijawahi kuzificha. Hoja ya kwanza: Nimehoji kuhusu vyombo vya ulinzi na usalama kuonekana kulinda usalama wa watawala na kuendelea kwao kubaki madarakani badala ya kulinda usalama wa Taifa na haki za wananchi wote. Hoja ya pili: Nimehoji kuhusu madai ya vyombo vya ulinzi na usalama kufanya kazi kwa maslahi ya kisiasa ya CCM badala ya kutekeleza wajibu wake kwa mujibu wa Katiba ya Jamhuri ya Muungano wa Tanzania. Hoja ya tatu: Nimehoji kuhusu mauaji ya wananchi, hususan matukio ya tarehe 29 Oktoba 2025, na umuhimu wa uchunguzi huru, ukweli, haki na uwajibikaji. Hoja ya nne: Nimehoji kuhusu matukio ya watu kutekwa, kupotezwa na vitendo vya ukatili, na wajibu wa vyombo vya dola kuhakikisha usalama wa kila Mtanzania bila kujali itikadi yake ya kisiasa. HIZI NDIZO HOJA ZANGU! Sasa badala ya kujibu hoja hizi, kuna wanaosema kwamba Peter Msigwa anazungumza haya kwa sababu hakupata uwaziri, ukuu wa mkoa au ukuu wa wilaya! Hebu niulize: Kutokuwa Waziri kunajibu vipi hoja ya watu kuuawa? Kutokuwa Mkuu wa Mkoa kunajibu vipi hoja ya wananchi kutekwa? Kutokuwa Mkuu wa Wilaya kunajibu vipi hoja ya vyombo vya ulinzi na usalama kutuhumiwa kufanya kazi kwa maslahi ya CCM? Na kukosa uteuzi kunajibu vipi swali la msingi kuhusu tofauti kati ya kulinda watawala na kulinda Taifa? Katika taaluma ya mantiki, hii inaitwa Ad Hominem Fallacy — kumshambulia mtoa hoja badala ya kujibu hoja yake. Pia ni kuhamisha mjadala kutoka kwenye maswali yanayohitaji majibu kwenda kwenye maisha binafsi ya anayeyauliza. Hata kama ningekuwa Waziri jana, Mkuu wa Mkoa leo na Mkuu wa Wilaya kesho, bado maswali haya yangehitaji majibu. Ukweli wa hoja hauamuliwi na cheo cha anayeitoa. Unaamuliwa na ushahidi unaoiunga mkono. Mimi sihoji kwa sababu ninahitaji cheo. Ninahoji wajibu wa mamlaka kwa wananchi. Kama kuna ushahidi kwamba hoja zangu si za kweli, uwekwe mezani. Kama vyombo vya ulinzi na usalama vinatenda kwa usawa, tujadili ushahidi huo. Kama kuna uchunguzi wa mauaji na utekaji, wananchi waelezwe hatua zilizochukuliwa na matokeo yake. Hayo ndiyo majibu yanayohitajika. Taifa haliwezi kujenga utamaduni wa uwajibikaji ikiwa kila anayouliza swali kuhusu haki za wananchi anajibiwa kwa kushambuliwa maisha yake binafsi. Mimi nimeuliza kuhusu usalama wa Watanzania. Wengine wanazungumzia uteuzi wangu. Nimeuliza kuhusu Katiba. Wengine wanazungumzia vyeo. Nimeuliza kuhusu mauaji na utekaji. Wengine wanazungumzia uwaziri. Sasa hebu turudi kwenye hoja. Kwa sababu hata kama Peter Msigwa asingekuwepo katika siasa za Tanzania, maswali kuhusu mauaji, utekaji, matumizi ya mamlaka na wajibu wa vyombo vya dola yangekuwa bado yanahitaji majibu. KUKOSOA MTOA HOJA SI KUJIBU HOJA. NA KUMSHAMBULIA ANAYEULIZA SWALI SI KULIFANYA SWALI LIPOTEE.

Hatia haina kaburi.” Hata uhalifu, kosa au uovu ukifichwa, ukafukiwa, ukasitiriwa au ukasahaulika katika jamii, hisia ya hatia haifi moja kwa moja. Mtu anaweza kufukia ushahidi. Serikali inaweza kuwanyamazisha mashahidi. Historia inaweza kupotoshwa. Lakini ndani ya dhamiri ya mwanadamu, hatia inaweza kuendelea kuishi kwa miaka mingi. Inaweza kumwandama katika kumbukumbu zake, ndoto zake, hisia zake na ndani kabisa ya nafsi yake. Serikali zinaweza kuficha uhalifu. Wanajeshi wanaweza kutunukiwa medali. Dunia inaweza kuendelea na shughuli zake. Lakini mzigo wa ndani wa yale yaliyotendwa unabaki hai. “Unaweza kuizika miili, lakini si kila wakati unaweza kuizika dhamiri.” “Kuna mambo ambayo hayazikiki kabisa ndani ya nafsi ya mwanadamu.”