مادام الاحباب ل بيوت الغلا تبني
لك ف الحشى بيت من يقدر على هدمه
ماكل احبك من اي انسان! تعجبني
مشاعري عند بعض الناس منعدمة
من يوم .. حبيتك اللّه لا يعاقبني
حطيت كل الحبايب “خارج الخدمه"
يازين الشعور اللي يجي فيك لا حبيت
أنا قمت احس بطهر روحي وبإيماني
واحس ان كل شي يبتسم لي ليّا لديت
واحس ان نور الصبح يطلع على شأني
ولا عاد فكرت بحياتي ولا اهتميت
طغى الحّب فيني لين سامحت عدواني
الناس في اول لقى ميه على ميه
مشكلتي اني ما اصيد الناس من بدري
عفوي واعامل عباد اللّٰه بعفويه
واطبيير فيهم واقلطهم وسط صدري
كم واحد تحسبه ماشي على النيّه
وتلاحظ انك على النيّه ولا تدري .
بكره تشع إن قالها اللّٰه أمانيك
مهما غفت في ليل الأقدار شمسك
لا يشغلك عن فرحة الجاي ماضيك
ولا يسرقك من واقعك صوت هجسك
ولا تيأس إن يبست منابت مساعيك
بكره يسيل الغيم ويطول غرسك
أنا مسالم ما أحب العداوات
العمر فاني والليالي قصيرة
ترى السكرت أحيان مثل الإجابات
الصمت نعمه ... له معاني مثيره
اللي يعيش الوقت عنده قناعات
لا مات يبقى عند الأجيال سيرة
ما هو ضروري تعيش عندك علاقات
العزلة أحيانا علاقة… كبيرة
الكرامة فرض ... يوم الحب سنه
نحشم انفسنا ويعجبنا التغاضي
من جرحنا نعذره .. ونصد عنه
مانضيع وقتنا في شي فاضي
بعد مانعطيه ... فوق اللي يظنه
نبعد ونكتب على صفحته ماضي
الحكي نرميه ف الصدر ونكنه
والصدور تشيل ماشالت الاراضي
قمنا نجنب عن كثير العلاقات
من كثرة اللي يجهلون المبادي
وجروحنا طابت وعدت سهالات
لو مالقينا ب الحقيقة ضمادي
جزنا وحطينا حدود و مسافات
من يوم صار الصد والبعد عادي
وما تلحق الطيب اذا صد شرهات
لا صار ما هوف الحياة انقيادي
أخبّيك عن عين المخاليق وأداريك
وأصون سرّك عن حكي كل الأجناس
وأكتبك بقلبي قصيدٍ وأخفيك
وأخاف تنطق بك حروفي للناس
ما كل من يقرى حروفك يوازيك
بعض المعاني ما تبي شرح وقياس.
أنت ياللي كل ما هزّ المحاني طيفه
جرّني طاريك من ربعي ومن جلاسي
كانك اللي فالمحبه موجس له خيفه
والله إني بين لوعة خاطري وعماسي
كل حب غير حبك .. ينكشف لي زيفه
وكل طيف غير طيفك ما يهز إحساسي
وكل وجهٍ غير وجهك فالوجيه أعيفه
وكل صوتٍ غير صوتك ما يقند راسي
صاير غريب وجيتك ما تطوّل
الظاهر ان قلبك تبدل غرامه
اما تجي كلك على الطبع الأوّل
والا فمان اللهُ درب السلامه
لك قلب كان يحبني بس تحوّل
منهو قدر ياخذ من أيدي هيامه ؟
والحين من عاليه عوّد وحوّل
ارخصت لك كل شي ، الا الكرامه
والله انك بصدري فوق حدّ الهيام
ما لغيرك ب قلبي يا حبيبي وجود
لو ابوصف غلاك ، ما كفاه الكلام
واصلٍ بالحشا فوق الابعد حدود
وحدك اللي احبَّه وغير حبك حرام
يا مُناي ودعائي عند لحظة سجود
أجيه شايل همومي وهو ما يدري
وأفتح معه مواضيع ادور ابتسامه
لاني واثق ب انه ما يخيب ظني
وتعود لي البسمه من عقب كلامه
مُجرد ما اقرا اسمه ينشرح صدري
وتبان ب وجهي من غلاته علامه
اجيه مهموم متكدر ضايق صدري
واعوّد والحزن فيني معلن انهزامه
واللّٰه أن صدري معافى وخافقي نظيف
لو أشوف الحزن في عين حسادي زعلت
الملامح بعض الأحيان تظهرني عنيف
ولا أنا بالكلمة الطيبة ما قد بخلت
أقبل بوجه يشرف ومنطوق عفيف
ولا لقيت اللي ينقص من حضوري رحلت
اتعدا عن عيوب البشر كنَّي كفيف
وأن تبين شي للعين جنبت وغفلت