મને જણાવતા આનંદ થાય છે કે, આદરણીય પ્રધાનમંત્રી શ્રી નરેન્દ્રભાઈ મોદીજીના જનસેવા અને રાષ્ટ્રસેવાના 25 વર્ષ પૂર્ણ થવા નિમિત્તે આજે રાજ્ય મંત્રીમંડળની બેઠકમાં સર્વાનુમતે અભિનંદન પ્રસ્તાવ પસાર કરવામાં આવ્યો છે. 7 ઓક્ટોબર 2001થી શરૂ થયેલી જાહેરજીવનની આ યાત્રાના 25 વર્ષોમાં માનનીય મોદીજીએ ગુજરાતના મુખ્યમંત્રી તરીકે 13 વર્ષ અને દેશના યશસ્વી પ્રધાનમંત્રી તરીકે 12 વર્ષ સેવા આપી છે. આ દરમિયાન તેમણે સત્તાને નહીં, પરંતુ સેવાને શાસનના કેન્દ્રમાં રાખીને 'રાષ્ટ્ર પ્રથમ'ના સંકલ્પની અવિરત સાધના કરી છે. ભૂકંપ, દુષ્કાળ અને વીજળી-પાણીની અછત સામે ઝઝૂમતા ગુજરાતને તેમણે માત્ર બેઠું જ ન કર્યું, પરંતુ ધબકતું અને દોડતું કર્યું. જ્યોતિગ્રામ યોજનાથી ઘર-ઘર સુધી 24 કલાક વીજળી પહોંચી અને રાજ્યની સ્થાપિત વીજક્ષમતા 8,750 મેગાવોટથી વધીને 71,965 મેગાવોટ થઈ. એક સમયે પાણી માટે તરસતું ગુજરાત સુજલામ-સુફલામ અને સૌની યોજનાથી આજે નર્મદા મૈયાના નીરથી પાણીદાર બન્યું છે. વાઇબ્રન્ટ ગુજરાત થકી ગુજરાતને 'ગ્લોબલ ગેટવે ટુ ધ ફ્યુચર' તરીકે ઓળખ મળી. લખપતિ દીદી, ખિલખિલાટ અને અભયમ જેવી પહેલોથી નારીશક્તિ સશક્ત બની. વનબંધુ કલ્યાણ યોજના અને ગરીબ કલ્યાણ મેળાઓથી વિકાસ છેવાડાના માનવી સુધી પહોંચ્યો. ગુજરાતનું વિકાસ મોડલ આજે રાષ્ટ્રવ્યાપી બન્યું છે. ‘મા અમૃતમ’માંથી આયુષ્માન ભારત, ‘નિર્મળ ગુજરાત’માંથી સ્વચ્છ ભારત મિશન, ‘કન્યા કેળવણી’માંથી ‘બેટી બચાવો-બેટી પઢાવો’ અને ‘ખેલ મહાકુંભ’માંથી ‘ખેલો ઇન્ડિયા’ની રચના થઈ. શ્રી નરેન્દ્રભાઈ મોદીને વિશ્વના 36થી વધુ દેશોના સર્વોચ ગૌરવ સન્માન મળ્યા છે. ગુજરાતના આ પનોતા પુત્ર માટે સાડા છ કરોડ ગુજરાતીઓ ગૌરવની લાગણી અનુભવે છે. વડનગરથી વિશ્વ ગૌરવ સુધીની આ યશસ્વી યાત્રા ‘વિકસિત ભારત @ 2047’ ના સંકલ્પને સાકાર કરવાનો આધારસ્તંભ છે. “We will do it”ના મંત્ર સાથે દેશના વિકાસ, સુરક્ષા અને ગૌરવ માટે સમર્પિત વ્યક્તિત્વ, કર્તૃત્વ અને નેતૃત્વને ગુજરાત કેબિનેટ હૃદયપૂર્વક અભિનંદન પાઠવે છે. 🙏