Terrum

O falecemento de Ángel Vila deixa a Vigo orfa dun activista incombusíbel. Dun loitador de todas as causas xustas. Do sindicalismo, pasando polo movemento veciñal até a loita en defensa do noso patrimonio e identidade. Dun home de compromiso tan consciente como xeneroso e permanente. Ángel era man tendida. O ombreiro que sempre sumaba na tarefa de construír, de transformar. Sempre desde abaixo, a pé de barrio, coa determinación de derrubar os muros da inxustiza e os límites que nos oprimen. Alentado na certeza de que a cidade é moito máis que un espazo senón, sobre todo, comunidade humana que afoga nas paredes ocas dos que a queren reducir a un parque temático. Foi desas persoas pequenas, das que falaba Galeano, que xuntas logran facer grandes cousas. Un militante do ben común. Sensíbel e solidario de vez coas ninguéns, coas empobrecidas e invisibilizadas. Deixa o mellor dos legados. O da esperanza en que outra cidade e outro mundo son posíbeis. Moito obrigado por tanto, compañeiro. Que a terra lle sexa leve.