تهادي يالليالي الموحشة بالخاطر المكبود
لو إن الفقد متوسد على مركاه في بالي
تروالي صغير و لاني بواعي و هو موجود
ياليت اني على هقواي باقي .. و يتروالي
حسبت ان الليالي الماضية ما منها مردود
و اثر كل البلاوي وراها صارت قبالي
لو إن الوقت حاول يزرع بصدري شجر و ورود
وش تفيد الورود ان كان صدري ربع خالي ؟
وقف من دون شمس الذاكره عتم الليالي السود
و اشوف الموت سارق ضحكتي من اجمل اعمالي
تهيّالي اشيل من الهموم اللي تساوي طرود
ابي اثبت على هول المصاب و لا تهيّالي
كسرني يوم قفّى و أنا قدم الزمن جلمود
عرف كيف الزمن يلوي ذراعي و يهدم آمالي
عرفته ظلي اللي اتذرى به و هو ممدود
و لا مره هقيت ان سبّه دموعي من ظلالي
- خالد الفحمان
يا ربي وإن ذكرتك حنّ لك خافق ورفَّت عين
و طاحت دمعتينٍ ما سترها الا طرف ثوبي
دخيلك لا تخليني لحالي لـ الزمان الشين
أنا مالي صبر عن رحمتك لو صبري أيوبي
تولّاني بـ عفوٍ يعتق رقبتي .. بـ يوم الدين
وهب لي من لدُنك اللي يبدّد وحشة دروبي
دعيتك والكفوف المستغيثة خاليات يدين
" يا ربي لا تعوّد خاليات الا .. من ذنوبي "
محمد العذبه








