𑘀𑘪𑘲𑘡𑘰𑘫 𑘄𑘬𑘰 𑘪𑘭𑘡𑘿𑘝 (अविनाश उषा वसंत)

पालघर येथील वरोरमध्ये आयोजित ‘उलगुलान’ वाढवण बंदरविरोधी आक्रोश सभेला उपस्थित राहून स्थानिक भूमिपुत्रांच्या संघर्षाला ठाम पाठिंबा दिला. यावेळी काँग्रेस पक्षाच्या वतीने वाढवण बंदरविरोधात भव्य बाइक रॅली काढण्यात आली. या रॅलीतून स्थानिक भूमिपुत्रांच्या संघर्षाला पाठिंबा देत वाढवण बंदर रद्द करण्याची जोरदार मागणी करण्यात आली. वाढवण बंदराचा प्रकल्प रद्द झाल्याशिवाय हा लढा थांबणार नाही. हा केवळ वाढवण बंदराचा प्रश्न नाही, तर जल, जंगल, जमीन, पर्यावरण, लोकशाही आणि येणाऱ्या पिढ्यांच्या भविष्याचा लढा आहे. उद्योगपतींच्या फायद्यासाठी स्थानिकांच्या जमिनी, समुद्र आणि निसर्गाचा विनाश करण्याचा अधिकार सरकारला कोणी दिला? हा लढा आता शेवटपर्यंत निकराने लढला पाहिजे. आंदोलनातील नेत्यांना अटक झाली, स्थानबद्ध केले, पदाधिकाऱ्यांची धरपकड झाली तरी आंदोलन थांबता कामा नये. नेते तुरुंगात गेले तर प्रत्येकाने संघर्षाची जबाबदारी आपल्या खांद्यावर घेतली पाहिजे. उद्यापासून एकही डंपर चालू द्यायचा नाही, हा निर्धार केवळ घोषणेत न राहता जनतेच्या एकजुटीतून दिसला पाहिजे, असे आवाहन यावेळी केले. या लढ्यात मुंबईपर्यंत जाऊन संघर्ष करणाऱ्या सृष्टी, अपूर्वा, शेजल यांसारख्या तरुण मुलींचे धाडस प्रेरणादायी आहे. आपल्या भविष्याच्या रक्षणासाठी त्या निर्भयपणे उभ्या राहत आहेत. त्यांच्या या जिद्दीतून प्रत्येकाने प्रेरणा घेतली पाहिजे. आपल्या आजोबांनी, वडिलांनी अत्यंत कष्टाने, त्यागाने आपल्यासाठी ही जमीन आणि ही संपत्ती जपली. त्यांच्या संघर्षाचा वारसा आपण पैशाच्या आमिषाला किंवा राजकीय फोडाफोडीला बळी पडून संपवायचा का? आज आपण आपल्या जमिनी आणि निसर्ग वाचवला नाही, तर येणारी पिढी आपल्याला कधीही माफ करणार नाही. इंग्रजांच्या ‘फोडा, तोडा आणि राज्य करा’ या नीतीप्रमाणे आजही लोकांमध्ये फूट पाडण्याचे प्रयत्न सुरू आहेत. मात्र आपण कोणत्याही आमिषाला बळी न पडता एकजूट कायम ठेवली पाहिजे. हा लढा कोणत्याही एका पक्षाचा नसून सामान्य माणसाच्या अस्तित्वाचा आहे. प्रशासनालाही स्पष्ट सांगू इच्छितो की, अधिकाऱ्यांचा पगार जनतेच्या करातून येतो, अंबानी-अदानींच्या खिशातून नाही. त्यामुळे त्यांनी उद्योगपतींच्या हितापेक्षा जनतेच्या हिताला प्राधान्य दिले पाहिजे. आंदोलनकर्त्यांना धमक्या देणे, त्यांच्यावर दबाव आणणे किंवा प्रकल्पासाठी दलालीचे आरोप होणाऱ्या प्रकारांकडे दुर्लक्ष करणे, हे प्रशासनाला शोभणारे नाही. अधिकाऱ्यांनी कायद्याच्या चौकटीत राहून जनतेच्या बाजूने काम करावे. मा.राहुलजी गांधी आणि काँग्रेस पक्ष देशभरातील जनआंदोलनांच्या पाठीशी ठामपणे उभे आहेत. महाराष्ट्र काँग्रेसचा कार्यकर्ता आणि नेतृत्वाचा भाग म्हणून मी या संघर्षात स्थानिकांच्या खांद्याला खांदा लावून उभा आहे. जिथे मदतीची गरज असेल, तिथे काँग्रेस पक्षाचा सक्रिय सहभाग राहील. भीमाशंकरच्या जंगलातील वृक्षतोड असो किंवा वाढवण बंदराच्या नावाखाली होणारा पर्यावरणाचा विनाश असो, निसर्ग आणि जनतेच्या हक्कांसाठीचा संघर्ष आम्ही सुरूच ठेवणार आहोत. संविधान वाचवायचे आहे, लोकशाही वाचवायची आहे आणि जल, जंगल, जमीन वाचवायची आहे. ही लढाई आता सामान्य माणसाने आपल्या हातात घेतली पाहिजे, असे आवाहन यावेळी केले. यावेळी मार्क्सवादी कम्युनिस्ट पक्षाचे आमदार विनोद निकोले, राष्ट्रवादी काँग्रेस पक्षाचे श्री. राज राजापूरकर, शिवसेना (उद्धव बाळासाहेब ठाकरे) पक्षाचे नेते आमदार श्री. अंबादास दानवे, मनसेचे नेते तथा माजी आमदार श्री. राजू पाटील, बहुजन विकास आघाडीचे श्री. हितेंद्र ठाकूर, शिक्षक भारतीचे (माजी विधान परिषद आमदार) श्री. कपिल पाटील तसेच पालघर जिल्हाध्यक्ष कॅप्टन सत्यम ठाकूर यांच्यासह विविध पक्षांचे नेते, पदाधिकारी, कार्यकर्ते आणि स्थानिक नागरिक मोठ्या संख्येने उपस्थित होते.

चलो वाढवण.. उलगुलान वाढवण बंदर विरोधी आक्रोश सभा... दि. ३० ऑक्टोबर २०२६ वेळ : सकाळी १० वाजता स्थळ : वरोर / वाढवण, पालघर #उलगुलान #वाढवण