Diaa Elsayed

كابتن ضياء السيد فى مداخلة معايا عبر برنامج فى ضهر الأهلى قال تصريح مهم جداً، تصريح محتاج يعيد النظر تماماً فى الأفكار المطروحة على السوشيال ميديا . كابتن ضياء السيد قال الواقع على أرض الملعب مش الواقع الإفتراضى ، شخصية المدير الفني ومنصبه هو الأهم فى الجهاز مع كامل الإحترام لمنصب مدير الكرة . على فكرة أشاد جداً بكابتن وائل جمعة والقصة مش قصة كابتن وائل جمعة خالص ، القصه أن فى فكرة زادت أوى وكبرت على السوشيال ميديا مرتبطة بمنصب مدير الكرة ومنحته أدوار أكبر من أدواره ، وحملته مسؤوليات أكبر من مسؤولياته . الأصل فى القصة يا شباب المدير الفنى .. شخصية المدير الفنى .. قدرات المدير الفنى .. لو أنت جايب مدير كرة يسيطر على أوضة اللبس فتأكد ان انت اخترت مدير فنى ضعيف الشخصية وتأكد إن إحتمالات الاخفاق أكبر مدير فنى وفق نظام نادي قوى هو الحل ولو رجعت للتاريخ هتعرف إننا بعدنا عن أصل القصة ، إحنا بنتكلم عن شخصية جوزيه لحد اللحظة ، مين اللى قرر نزع شارة الكابتن من الحضرى ؟ مين اللى اللاعيبه كانت بتعمله ألف حساب ؟ مش مانويل جوزية ؟ لما بتتكلم عن البدرى وانه شخصيه قويه .. وصلك منين غير من تصرفاته مع اللاعبين وهو مدير فنى ؟ منصب مدير الكرة هو حلقة وصل دايماً بين الجهاز الفنى والإدارة ، والعنصر الأهم هو المدير الفنى حتى كولر .. نجح فى وجود سيد عبد الحفيظ ، وحقق نفس النجاح مع خالد بيبو فى أول تجاربه كمدير للكرة ، رغم أن فى جماهير على السوشيال هاجمته .. خد نفسك .. واتعامل بهدوء

سألت كابتن زكى عبد الفتاح سؤال لولبى شويه ، أنت كنت الأقرب لبوب برادلى ، ومدرب الحراس اللى فى جهازه دايماً ، بس كابتن ضياء السيد كان المدرب العام ، مكنش بيحصل مشاكل فى النقطه دى ؟ رد كابتن زكي بيكشف اد ايه كابتن ضياء السيد ده بنى ادم جميل بجد ، قالي ضياء السيد راجل واثق فى نفسه جداً وساعد بوب برادلى كتير جداً وصعوبات كتير كان كابتن ضياء السيد هو اللى يحلها وعلاقتى بيه حلوه جداً لانه بيشتغل وبس ومالوش فى اى صراعات ولا مين مكان مين ولا الكلام ده صدقوني مش بتكون سهله خالص المواقف دى يا شباب ، خاصة ان كابتن ضياء كان معظم عناصر المنتخب هو دربهم فى كاس العالم للشباب وعلاقته بيهم ممتازة جدا ، ومع ذلك بيقدم دوره على أكمل وجه جميل يا كابتن ضياء ودايما سيرتك حلوه وجميله @diaaelsayed