ً
حاولت أكون إنسان عادي و هادي
ولا قدرت آكون -أكثر من إنسان-
يمّل من روتينه الأعتيادي
لو كان كله خير وأفضال وآمان
وينفر من أنْه يعيش لو يوم عادي
موته على الدنيا و محياه سِيّان
لي دين و مروّة و سَلم و مبادي
لو كنت أطيع النفس في بعض الأحيان
وإذا بياضي ما يغطي سوادي
يعوضني حسن العقيدة و الإيمان
هذا أنا في ملتي و اعتقادي
وبيني و بين اللي يغنّون شتّان
مرتاح في عفويّتي و إنفرادي
يا اللي تقولون اتبع فلان وفلان
ذاك أبيض و ذاك أسود و ذا رمادي
وأنا أكبر من أنها تحددني ألوان
خلوني بْـ وادي و روحوا بـ وادي
يا كثر ما فوق الآراضين ودّيان
الله خلقني شاعرٍ لا إرادي
وتبوني أمسك كفّ؟ و اسكّت لسان؟
بـ آغنّي إن غنّى على الدوح شادي
و آميل لا ميّل هوى العصر الأغصان
والله ما أنَزّل عن ذلولي شدادي
إلين تلهج بأسمي الأنس و الجان
1
104
ً
على كثر الشعور اللي ذبح صدري عجزت أبوح
ياليت الشعر يستلّ الشعور اللي ذبح صدري
أنا روحٍ غدت في غيهب الدنيا تدور روح
وأنا دوحٍ تشفق للرِشاش و نايح الكدري
أدوّر بين كوم الذكريات الأولات مزوح
عساي ألقى بها ما ينتعش منها ورق سدري
و أجي و أروح في دربي ولا أدري ليه أجي و أروح
مثل ما ارسم حروفك في ضباب الجام دون ادري
بعيدي وأنت كنت الأوضح لعيني و الأكثر ضوح
والأقرب لي من قلوب الاوادم فوقي و حدري
والأبعد من ظنون السو و الأعلى في حشاي صروح
والأطيب من شذا النوّار و أنقا من ضيا بدري
قبل تستبدل ايدين الغرام الحانية بجروح
و تستسهل مدا صبري الحليم و تشتهي غدري
فقدتك صح لكن ما ترك لي جرحك المفتوح
حنين إلا يوريني مساومته على قدري
ملام عيوني أكبر من ملامة حرفي المذبوح
لو إن اللوم كله لي على إسرافي لك و هدري
بتفقدني ليا من بلّ دمعك شالك المطروح
ولا عيّنت حولك من يحنّ النعس الخدري
وترجع لي تشيلك حسرتك شيل البحر للوح
وأغني لك وأنا مشتاق لك ماعاد به بدري
ما والله تدخل لقلبي لو إن قلبي سفينة نوح
عقب ما جاك مصفيه الهيام و صرت له جدري
تهنى فالحياة الناقصة يالناقص المملوح
عليك أنت و على الأيام يا كثري و يا ندري
1
81


