ᴹᵘˢᵗᵃᶠᵃ ᴷʰᵃˡᶦᵈ🌱

أنا بنتمي للمكتب والجامعة والبيت والأماكن دي

عندي شغل الشهر الجاي في بريطانيا واسكتلندا..بقالي سنين بحضر نهاية العام وبستقبل عام جديد في المملكة المتحدة..بس فعلاً لو الظروف سمحت وبقى عندي إختيار للعيش في لندن أو اي مكان داخل الـ UK, هيبقى الإختيار الأول لأدنبرة..أجمل بقعة على وجه الأرض بالنسبالي

شبه الورد..

رغم إن فيه ناس عايشين في الخلا, بردو ربنا عادل, ولو ظالم نايم على سرير دفا والمظلوم نايم على أرض في برد..أكيد فيه حكمة..وإختبار للي لهم صوت عشان يعبروا به بدل اللي مالهمش الحق في الكلام, وواجب شكر لله من اللي لهم بيوت بدل اللي مش لاقيين حتى مكان للمنام..

كل ما بحس إني مضغوط ومرهق برش بيرفيوم حواليا وعلى إيديا, وتفضل ريحة البيرفيوم ملازماني في المكان..نفس البيرفيوم في البيت والمكتب وفي العربية ومش بغيره, حتى لو عندي أنواع تانيه من البرفيومز..يفضل دايماً نوع معين كده له قيمة عندي وبعتز به لأسباب كتير حلوة

الجو في المنوفية جميل خالص..ليل بارد خفيف والسما زي ما يكون فيها مطر..ومحشي كرنب عليه قشطة من إيد جدتي وعمتي وفراخ في الفرن وسبانخ باللحمة مع العيش المحمص..أنا النهاردة مبسوط أوي ومش عايز أرجع القاهرة, بس لولا عندي شغل كنت فضلت قاعد ومريح أعصابي ومخي

بزعل أوي لما حد يقترح عليا تعارف لخطوبة وأبقى متخيل إن زمام الأمور بالضرورة يكون عندي بس..إني أقرر هقبل أو لأ! وليه مبديش مساحة للطرف التاني أنه كمان يقرر هل أنا شخص مناسب لها ولا لأ..ده كمان قمة الإنصاف والتصالح مع النفس, أنك تتقبل الرفض من حد من غير جلد ذات

الحرية مش معناها إن الناس يكون لها الحق تعبر عن نفسها بدون إزعاج من غيرها..خالص, مش ده مفهوم الحرية..عمر الإنسان ما هيقدر يبقى حُر بجد غير لما يكون عندة القدرة أنه يقول لكل الناس الكلام اللي هما مش حابين يسمعوه..ساعتها بس هيبقى حُر, غير كده كلها شكليات.

قصة الست بتاع بيت الأحلام دي بتخليني أتأكد قد ايه أنا بكره دايماً أنصاص الحكايات.. المواضيع اللي من طرف واحد اللي فيها ملاك وشيطان, ضعيف ومتجبر وهكذا..بس اللي بيصعب عليا أكتر هو المُتلقي, الطرف التالت في الحكايات لو محاولش يفهم وينقذ روحه من فخ الإستغفال.

شعور فقدان الأب اللي بعيشه مع كل حد أعرفه بيفقد أبو, شعور حزين أوي ومفهومه عندي شبه الكابوس اللي بيبقى وقت النوم, وببقى فاهم كويس بدون ما أكون بعبر حتى عن ده, حجم الآسى اللي في الحياة وهى بتمحى من قاموسهم أحن وأرق أربع حروف عاشوا كتير ينطقوا بها

وصار يجري وينساني وأنا بجري في طريق تاني !

وكأننا متقابلين إمبارح ولا حاسين إن إحنا بقالنا سنين الشوق بينا بيتألم !

سبحان الله مفيش طريق وصفه ربنا للبشر ومكنش فيه نجاتهم وفرحهم..حتى في الرزق وصراعات الناس بين الحلال والحرام وأختيارهم لطريق الحلال حتى لو كله مصاعب..و لو أنهم كملوا في طريق ربنا ومرجعوش من نص السكة, حتماً هيلاقوا السر في فرحهم المتوقع دايماً في أنهم بس كملوا

كان عندي شغل النهاردة في سفارة النرويج..واتعزمت على زيارة عشان أشوف الشفق القطبي في نوفمبر وألوان السما الحلوة..أنا زرت النرويج مرة واحدة في حياتي..وكانوا أجمل أيام شوفت فيهم شكل الكهوف اللي بالزجاج وسط الجبال الثلجية بليل في ترومسو وجزر لوفوتين وسفالبارد

بعد يوم شغل طويل ومرهق في منطقة الزمالك,قررنا نعمل أحلى حاجة مجنونة وسعيدة

ممكن الوقوع في الحب يبقى في ديسمبر عادي وعلفكرة بيبقى ألطف كتير مع المطر والسقعة..ودايماً أجمل خروجات بتبقى في عز الشتا والدنيا تلج وعن تجربة, بتحس نفسك بتقول أحلى كلام وبتتصرف برقه كده لدرجة بتخليك بعدين تقول لروحك أنت إزاي كنت كده ! 😄

هو أنتي ليه بعيدة كده ! ومستحيلة بالشكل ده !!

هل الناس محتاجة أصحاب مقامات وكرامات ياخدوا بإيديهم لتحسين معيشتهم وعلاج مرضاهم ونجاح عيالهم ؟! أكيد أنا فاهم ده ليه بيحصل..عشان الناس مش لاقيه حد يلبي إحتياجاتهم..عشان الفقر والجهل بيكتف الناس..الناس بس ياربي محتاجين اللي يشتغل عشانهم ويشغلهم معاه لمصلحتهم