Nadia

ڈسکہ کی رہائشی زہرہ قدیر کی یہ دل دہلا دینے والی کہانی ہے یہ سال 2024 کاواقعہ ہے۔ زہرہ ایک نیک سیرت خاتون تھیں جن کی عادت تھی کہ وہ روزانہ متعدد بار اپنے والد اور بیرون ملک سعودی عرب میں مقیم شوہر سے فون پر بات کر کے ان کی خیریت معلوم کرتی تھیں اور اپنا حال احوال بتاتی تھیں۔ وہ ایک معصوم بیٹے کی ماں تھیں اور اس اندمناک واقعے کے وقت وہ نو ماہ کی حاملہ بھی تھیں۔ ان کے شوہر سال میں ایک یا دو بار انہیں اور ان کے بچے کو اپنے پاس سعودی عرب بلا لیا کرتے تھے۔ زہرہ کے شوہر کی اس کے ساتھ محبت اور اپنائیت سسرال والوں کے دل میں حسد اور جلن کی آگ سلگانے کا سبب بن گئی، کیونکہ ساس اور نندوں کو یہ بات ناگوار گزرتی تھی کہ ان کا بیٹا اور بھائی اپنی بیوی سے اتنی محبت کیوں کرتا ہے۔ ​واقعے سے ایک روز قبل جب زہرہ نے اپنے والد غلام شبیر سے معمول کے مطابق بات نہ کی اور ان کا فون بند یا رابطہ سے باہر ملا، تو والد کے دل میں تشویش کی لہر دوڑ گئی اور وہ خود بیٹی کے گھر جا پہنچے۔ گھر میں قدم رکھتے ہی انہوں نے بیٹی کو آوازیں دیں، تو زہرہ کی ساس نے انتہائی سرد مہری سے بتایا کہ وہ گھر میں موجود نہیں ہے اور غالباً کسی کے ساتھ بھاگ گئی ہے۔ ​یہ سن کر والد کا دل بیٹھ گیا اور وہ فوراً زہرہ کے کمرے کی طرف گئے، جہاں وہ موجود نہیں تھیں۔ والد نے محسوس کیا کہ کمرے کا فرش حال ہی میں دھویا گیا ہے اور زہرہ کا ننھا بیٹا وہاں اکیلا گم صم بیٹھا ہوا ہے۔ اس منظر نے والد کے شکوک کو یقین میں بدل دیا، خصوصاً اس لیے بھی کہ ماضی میں بھی اس سسرال کی جانب سے زہرہ کو قتل کرنے کی کوشش کی جا چکی تھی جسے اس وقت صلح صفائی سے رفع دفع کر دیا گیا تھا۔ انہوں نے فوراً رشتہ داروں کو ساتھ لے کر بیٹی کی تلاش شروع کی اور مقامی پولیس کو بھی واقعے سے باضابطہ آگاہ کر دیا۔ ​جب شبیر احمد کی درخواست پر پولیس نے مقدمہ درج کر کے سسرال والوں کو حراست میں لیا اور سختی سے پوچھ کچھ کی، تو ایک بھیانک حقیقت سے پردہ اٹھا۔ مقتولہ کی ساس اور نند نے انکشاف کیا کہ انہوں نے اپنے دیگر رشتہ داروں کی مدد سے زہرہ کو بیدردی سے قتل کرنے کے بعد ل اش کے ٹکڑے کر کے نالے میں پھینک دیے تھے۔ پولیس ترجمان وقاص علی کے مطابق ملزمہ خواتین نے تفتیش کے دوران اعتراف جرم کرتے ہوئے واردات کی تمام ہولناک تفصیلات بتا دیں اور قتل میں استعمال ہونے والا ٹوکا اور چھری بھی برآمد کروا دی۔ زہرہ کی ساس نے اعتراف کیا کہ اس کی بیٹیوں، ایک نواسے اور ایک دیگر عزیز نے مل کر اس سازش کو عملی جامہ پہنایا۔ اس اندوہناک جرم کے پیچھے محض جلن اور حسد کارفرما تھا، اور اس میں صرف گھر کی عورتیں ہی نہیں بلکہ ایک نند کا بیٹا اور باہر سے لاہور سے بلایا گیا ایک عزیز بھی شامل تھا۔ ​پولیس نے تقریباً 48 گھنٹے کی مسلسل اور دشوار گزار محنت کے بعد نالے سے زہرہ قدیر کے جسم کے ٹکڑے تلاش کیے۔ لاش کے کچھ اجزاء ادھورے اور کچھ ملے، جن کا پوسٹ مارٹم کروانے کے بعد باقیات والد شبیر احمد کے سپرد کی گئیں۔ وہ المناک منظر اس وقت دیکھنے میں آیا جب زہرہ کے مسخ شدہ جسم کے ٹکڑوں کو غسل دینے والی خواتین کے ضبط کا بندھن ٹوٹ گیا اور وہ پھوٹ پھوٹ کر رو پڑیں، ان کا کہنا تھا کہ انہوں نے اپنی پوری زندگی میں اتنا مشکل اور دل دہلا دینے والا غسل کسی میت کو نہیں دیا۔ پولیس نے اس وحشیانہ جرم میں ملوث تمام ملزمان کو گرفتار کر لیا جو اب اپنے کیے کی سزا بھگت رہے ہیں۔