simone

يعني شو هالقصة المجلعصة؟ قلّك في ناس بدرعا قرروا هيك فجأةً إنو يجنّدوا مسلحين أردنيين و يبعتوهن ع كنيسة بالكرك بالأردن، مشان شو؟ قال ليقتلوا مسيحيين بكنيسة بعد تشييع جنازة.. ليه؟ هيك لأنن تكفيريين.. طيب.. بعدين هالمسلحين بقا بينكمشوا و بيطلعوا أخّين أردنيين و صهرهن، إي؟ و الله فـ بيطلع الطيران الأردني و بيقصف الناس اللي بدرعا اللي ما حدا بيعرف ليش جنّدوهن فجأةً.. بيقوم ما بيصيب غير نساء و أطفال تحديداً، لا و بيفتخر بهالشي و بوقاحة بالغة.. و بيسميه "الردع الأردني" أبانا الذي في المخابرات.. هو من طول عمرك ألعابك وسخة و سافلة بس بالعادة بتكون شوي أركز من هيك، المهم هات خبّرنا: لوين حابب توصّل؟ على شو ناوي؟

بس تسمع حدا عم يقلّك "الشعب جوا مو فاضي لهالتفاهات و كل همّو لقمة الخبز و الكهربا" اعتبرها دغري مسبّة و افهمها كإهانة، و قلّو إذا إنت مرتزق و عينك جوعانة فـ مو كل الناس متلك، و تذكّر دائماً إنو واحد من أوائل شعارات الثورة السورية كان: "يا بثينة و يا شعبان الشعب السوري مو جوعان"

و بعدين تعال لقلك.. هي الفكرة تبع "الشعب جوا ما عم يفكر إلا بلقمة الخبز و مو فاضي لمهاتراتكن 🥺" هيي أولاً أكتر شي شعبوي ممكن ينقال، و تانياً الهدف الأساسي منها تعويم إلغاء السياسة بالمجتمع، يعني استبعاد مسائل العدل و الحرية و آليات توزيع السلطة و الثروة من الشأن العام و تضييقو للحديث عن عدد ساعات التقنين و إنارة دوار المدريشو (إنو "خلص شو بدنا بهالوجع الراس؟ خلينا نحكي بس بالكهربا و الخدمات")، و تالتاً بالأساس غير صحيحة.. ليش شو هو الهدف من الحكي بالسياسة؟ مو تحسين أوضاع "الشعب جوا 🥺" على كل المستويات؟ منين طالعلي بهي تبع إنو إذا حكينا أفكار معينة منكون عم ننفصل عن المجتمع؟ و رابعاً الكافيهات بالبلد معباية حبيبنا.. و العالم عم تقعد يومياً بالساعات و عم تحكي بكل شي بالحياة.. إشمعنى يعني لازم ما يحكوا تحديداً بالمواضيع الاجتماعية و السياسية اللي بتنطعج إنت لما يحكوا فيها؟ سنفور ذنبو مغفور إنت يا حلو؟ و خامساً شو رأيك إنو إنت نفسك إذا قلنالك إي طيب بس في ناس مريّشة مادياً من ضمن "الشعب جوا 🥺".. ليش هدول ما بيحكوا سياسة؟ حتقلنا إي حبيبي هدول مو فارقة معن الشأن العام كلو لأنو معن مصاري.. طب ما حيّرتنا أخي الكريم؟ مين حيحكي سياسة ع أصولها لكان؟ جارتي الألمانية؟ ولّا بشار الأسد؟