Zvac

تاسې لږ سم غوږ کېږدی، نن به سیاست او ط.لب پرېږدو، د ملا صیب او د هغه د دیني تفسیر، قرائت او تعبیر په اړه به خبره وکړو. یا لومړۍ زما پوسټ په غور ولولئ، بیا د مفتي صیب خبرو ته غوږ کېږدئ او یا د مفتي صیب خبرې لومړی واورئ او بیا زما پوسټ ولولئ. مفتي صیب وایې چې ښځه به لیک نه زده کوي او د دې منع په سورة نور کې راغلي ده، دومره تعلیم د ښځې لپاره ضروري یا اړین نه دی چې هغه ماسټره او ډاکتره شي، د دې خبرې لپاره یې هم د دلیل په توګه د حنفي فقهي د معتمد عالم ملا علي قاري رحمه الله قول نقل کړی دی چې د نارینه ډاکتر لپاره د ښځینه ناروغ د بدن ډېره محرمه برخه کتل هم جایز دي. له دې وروسته مفتي صیب په ډېر یقین سره په هغو ښځو او نجونو د فحشاء تور لګوي چې مکتب او پوهنتون یې لوستی وي او بیا له شیخ حسن جان رحمه الله څخه نقل قول کوي او د پېښور د کوم پوهنتون (2000) محصلینې په فحشاء تورنوي... مفتي صیب وایې چې په نورو اسلامي هېوادونو کې د نجونو تعلیم زما لپاره دلیل نه شي کېدای او نه زه د قطر، دوبی او مصر تابع یم، ځکه موږ ته دین پیغمبر راوړی دی او ما ته به د قرآن کریم او پیغمبر طریقي په دلیل کې وړاندې کوئ، لنډه دا چې په پیغمبري دین کې د نجونو تعلیم نه شته. وروسته د حضرت عمر فاروق رضي الله تعالی عنه قول د دلیل په توګه وړاندې کوي چې وایې خپلې ښځې ته سورة النور وښیئ، خط مه ورته ښیې. مفتي صیب یو ګام مخې ته تللی دی، وایې چې د مکتب له بنیاده مې بد راځي، له همدې امله خپل زامن مکتب ته نه پرېږدي، وایې چې د مکتب شاګردان د بې ادبې سمبولونه دي. بیا وایې چې زموږ دین له (اقراء) څخه پیل کېږي، لوستل به کوي او الله تعالی به دې مقام ته رسوي، خو زموږ په خلکو کې یو تاوان دا دی چې اقراء یې په مکتبونو او پوهنتونونو لیکلی وي... او دا د قرآن کریم تحریف دی چې (اقراء) په مکتب او پوهنتون ولیکل شي، علم په اصل کې قال الله او قال رسول الله او قال الصحابة دی او دا ته چې کوم شی زده کوي دا کسب دی... مفتي صیب وایې چې له (اقراء) څخه مراد او مقصد د مکتب او پوهنتون ویل نه دي او نه و، بلکې د قرآن او حدیث ویل او لوستل ورڅخه مراد دي... بیا وروسته قسم کوي چې د مکتب او پوهنتون پوښتنه له تاسې څخه نه کېږي، دا زما او هم زما د استاذ عقیده ده، خو له تاسې څخه به د قرآن کریم پوښتنه خامخا کېږي. ....... تاسې د مفتي صیب وینا واورېده، د هرې خبرې لپاره دلیل وړاندې کوي، یا د قرآن کریم ایت کریمه، یا د رسول الله حدیث شریف او یا د صحابه کرامو اقوال او د معتمدو فقهاو اقوال. که زه ډېر په ساده او لنډ ډول درته ووایم؛ نو زموږ دیني متنونه ادبي دي او له ادبي متنونو څخه د لوستونکو په شمېر تعبیرونه او تفسیرونه کېدای شي. د نجونو د تعلیم او په ټوله کې د مکتب په اړه د مفتي صیب دیني برداشت، تفسیر او تعبیر ځانګړی نه دی، بلکې یوه لویه کتله ملا صایبان په همدې باور او نظر دي او همدغه یې له دینه انګېرنه ده. دا نن چې د نجونو مکاتب بند دي او په ټوله کې مکتب ته ډېره اعتناء نه کېږي، لامل یې همدا باور او نظر دی. نه یواځې د نجونو د تعلیم او مکتب مسله، بلکې نور ټولنیز او سیاسي مسائل هم شته چې د دې ډلې نظرونه پکې له واقعیت سره اړخ نه لګوي او نه د تطبیق وړ دي. هغه ملګري چې دیني زده کړي نه لري او مفتي صیب ته بد رد وایې دا هم ناسمه ده او هغه چې زده کړي لري او دا نه مني چې ګنې دغه دیني برداشت او تفسیر زموږ په ټولنه او هېواد کې شته او یا د دغسې ملاصایبانو شتون د ګوتو په شمار ښیې، هغوی هم ځان تېرباسي. د مفتي صیب او ملا صایبانو دغه دیني تفسیر او تعبیر هغه وخت لا خطرناک شي چې دوی یې له منبره د دین یواځنی په حقه تفسیر او تعبیر وګڼي او نور تفسیرونه او تعبیرونه رد کړي او که د چا نظر د دوی له نظره خلاف وي، ډول ډول ټاپې پرې ولګوي او یا د ټوپک په زور له دینه خپل برداشت په خلکو تحمیل کړي. لنډه دا چې دا زموږ د ټولنې یوه واقعي او حقیقي ستونزه ده، ملا صیب، مفتي صیب او خلیفه صیب ته په بدو ویلو نه حل کېږي، یوه عملي حلا لار غواړي. دا خو زما نظر و، تاسې هم لیږ غور پکې وکړئ، که دا ستونزه درته رښتیا ستره ټولنیزه ستونزه برېښې، بیا به یې په حل لار پسې ځان ستړی کړو.