سہیل بچے، بلاول اور آپ ہم عمر ہیں لیکن بلاول علم، تجربے، سیاسی سوجھ بوجھ میں آپ سے ھزار گنا آگے ہے۔ بلاول نے جب آپ سے کہا کہ آپ فتح کا اعلان کر کے واپس جاکر بقیہ وقت میں صوبے کے عوام کی خدمت کریں تو دراصل انہوں نے آپ کی طرف ایک سیاسی رسی پھینکی تھی تا کہ آپ سیاسی گڑھے سے باہر نکل آئیں۔ آپ اس رسی کو گڑھے سے باہر نکلنے کی بجائے اسے اپنے گلے میں پھندہ لگا کر سیاسی خودکشی کرنے کیلیے استعمال کرنے کی کوشش کر رہے ہیں۔ ویسے بچے، ہو سکتا ہے کہ آپ کی عادت بلاول کی طرح لکھنے پڑھنے کی نہ ہو، لیکن اگر آپ حادثاتی طور پر چار کروڑ عوام کے صوبے کے وزیر اعلیٰ بن ہی گئے ہیں تو تاریخ کا مطالعہ کرنے میں کوئی مضائقہ نہیں۔ آپ کو پتہ ہونا چاہیے کہ بلاول کے نانا نے آخری وقت تک پاکستان کو متحد رکھنے کی کوشش کی تھی - جب پاکستان ٹوٹ گیا تو بلاول کے نانا نے ہی بچے کھچے پاکستان کو متحد کیا اور نئے پاکستان کا نعرہ بھی انہوں نے ہی آج سے 55 سال پہلے لگایا تھا۔ آج کے پاکستان کی آئینی، معاشی، معاشرتی اور دفاعی عمارت کی بنیاد بلاول کے نانا نے ہی رکھی تھی۔ رہی بات بلاول کے والد کی تو محترمہ بینظیر بھٹو کی شہادت کے بعد جب پورے ملک میں آگ لگی ہوئی تھی تو اس وقت بلاول کے والد ہی تھے جنہوں نے پاکستان کھپے کا نعرہ لگا کر وہ آگ بجھائی تھی، ملک کو پارلیمانی نظام اور حقیقی صوبائی خودمختاری دی تھی، جس پر آپ آجکل چھلانگیں لگا رہے ہیں۔ بلاول اور ان کے والد نے ہی ایک بار پھر آپکے لیے مذاکرات کا دروازہ کھولا ہے جسے آپ نے ٹھُڈے مار کر بار بار بند کر رہے ہیں۔