Asma Hyder

آج بلوچ قوم نے صرف ایک فرد نہیں کھویا، بلکہ اپنی تاریخ کا ایک زندہ، متحرک اور مزاحمتی باب کھو دیا ہے۔ ماما قدیر بلوچ محض اپنے بیٹے کی تلاش میں نکلنے والے ایک باپ نہیں تھے؛ وہ بلوچستان کے ہر اُس غم زدہ ماں باپ اور ہر اُس خاندان کی اجتماعی آواز تھے جو جبری گمشدگیوں سے لے کر ہر طرح کے ریاستی جبر کا شکار رہے۔ پیرانہ عمری اور کمزور جسم کے باوجود، ہمت اور عزم کے ساتھ انہوں نے سولہ برس تک کوئٹہ اور کراچی کے پریس کلبوں کے سامنے بھوک ہڑتالی کیمپ لگا کر بیٹھے رہے اور مسلسل دنیا کو یہ باور کراتے رہے کہ بلوچ کے ساتھ کس قسم کی ناانصافیاں ہورہی ہیں۔ انہوں نے ہزاروں میل کا پیدل سفر اس لیے کیا تاکہ دنیا مزید لاعلمی اور خاموشی کا سہارا نہ لے سکے۔ان کی جدوجہد ایک اجتماعی آواز تھی۔ انہوں نے ہزاروں بلوچ خاندانوں کے کرب، دکھ اور تکلیف کو اپنی ذات میں سمو کر اسے انصاف اور وقار کے ایک واضح اور مسلسل مطالبے میں ڈھال دیا، ایسا مطالبہ جو انصاف، انسانی وقار، اور بنیادی حقوق کی بحالی سے کم کسی چیز پر راضی نہیں تھا۔ ماما قدیر بلوچ کا انتقال ایک ناقابلِ تلافی نقصان ہے، مگر ان کی جدوجہد یہاں ختم نہیں ہوتی۔ وہ ہر اُس ماں میں زندہ ہیں جو اپنے لاپتہ بیٹے کی راہ دیکھ رہی ہے، ہر اُس بہن میں جو سڑکوں پر احتجاج کر رہی ہے، اور ہر اُس نوجوان میں جو ناانصافی کو مقدر ماننے سے انکار کرتا ہے۔ بلوچ قوم کے لیے ماما قدیر بلوچ ہمیشہ ایک استعارہ اور مزاحمت کی علامت رہیں گے، اور ایک یاد دہانی کہ تاریک ترین حالات میں بھی ایک پیر مرد نے کھٹن حالات اور رکاوٹوں کے باوجود صبر، ہمت اور مستقل مزاجی، کے ساتھ مزاحمت اور جدوجہد کو زندہ رکھا۔