DhivehingeBinDhivehinah

ސަރެންޑަރ އެންޑް ރީގްރާންޓް‘ އަކީ އައު ރިއަލް އެސްޓޭޓް ބިލުގެ 89 ވަނަ މާއްދާގައި ރަސްމާލެއަށް ބޭނުންކޮށްފައިވާ ނިޒާމަށް ކިޔާ ނަމެވެ. މިއީ ފަންނީ ނަމެއްހެން ހީވި ނަމަވެސް، މީގެ މާނަ ވަރަށް ސާދާއެވެ. ’ސަރެންޑަރ‘(ދޫކޮށްލުން) ގެ މާނައަކީ، މީހަކު އޭނާގެ މިލްކިއްޔާތު ވިއްކާލާއިރު، އޭނާގެ ކުލީގެ އެއްބަސްވުމުގައި ބާކީ އޮތް މުއްދަތެއް އަނބުރާ ޙަވާލުކުރުމެވެ. ’ރީގްރާންޓް‘(އަލުން ދިނުން) ގެ މާނައަކީ، އަލަށް ގަންނަ މީހާއަށް ފުރިހަމަ 99 އަހަރުގެ މުޅިން އައު ކުލީގެ އެއްބަސްވުމެއް ދެން ލިބިގެންދިއުމެވެ. އާންމު އުޞޫލުންނަމަ، ގަންނަ މީހާއަށް ލިބޭނީ ވިއްކި މީހާގެ އެއްބަސްވުމުގައި ބާކީ އޮތް އަހަރުތަކެވެ؛ އެހެންކަމުން ދުވަހަކުން އެ ބިން އަނބުރާ ދައުލަތަށް ލިބެއެވެ. ނަމަވެސް، ’ސަރެންޑަރ އެންޑް ރީގްރާންޓް‘ ނިޒާމުގެ ދަށުން، އެ މުދަލެއް ވިއްކާލާ ކޮންމެ ފަހަރަކު މުއްދަތު އަނބުރާ 99 އަހަރަށް ބަދަލުވެއެވެ. މީގެ އިތުރުން 78 ވަނަ މާއްދާގައި ބަޔާންކުރަނީ، މުޅި ސަރަޙައްދަށް ޑިވެލޮޕަރަށް ދީފައިވާ ކުލީގެ މުއްދަތު ހަމަވުމަށްފަހުވެސް، ގަންނަ ފަރާތްތަކުގެ ކުލީގެ އެއްބަސްވުންތައް ދެމިއޮންނާނެ ކަމަށެވެ. ލިޔެކިޔުމުގައި ކޮންމެ އެއްބަސްވުމެއްވެސް ޤާނޫނުއަސާސީގެ (މާއްދާ 251) 99 އަހަރުގެ މިންގަނޑަށް ފެތެއެވެ. އެކަމަކު ޙަޤީޤަތުގައި މި މުއްދަތަކަށް ދުވަހަކުވެސް ނިމުމެއް ނާންނާނެއެވެ. ’ސަރެންޑަރ އެންޑް ރީގްރާންޓް‘މި ނިޒާމަކީ ކުއްޔަށް ދިނުން ވިއްކާލުމަކަށް ބަދަލުކޮށްލާ ނިޒާމެކެވެ.