Eslam Mohamed

لماذا نكره صلاح؟ كتب الأستاذ Ibrahim Elgarhi الزميل فريدريك نيتشة، صاحب الفضل علينا في قراءة أخلاق العبيد وتقديمها لنا على طبق من الفضة الخالصة، ذكر في كتابه العظيم On the Genealogy of Morality (في أصل الأخلاق) مفهوم فلسفي اسمه ”الضغينة المتراكمة“. وهي نوع من الكراهية، سببه مش ان حد آذاك أو اعتدى على حق من حقوقك، ولكنه أخطأ خطأ جسيما في انه بقا أحسن منك. وفي العادة، ان علاقتك بهذا الشخص تبدأ بإعجاب شديد، وربما تحاول التقرب منه، وبعد فترة تكتشف ان الإعجاب تحول تدريجيا إلى ضيق، والضيق إلى نفور، والنفور إلى كراهية حقيقية. سيبك من كلام الناس الخايبة اللي بتقول ان كراهية الناس لمحمد صلاح حسد عادي او حقد.. العم نيتشة بيشرح عملية نفسية أعقد بكتير.. العملية اللي بتحصل لما الإنسان يحس بالعجز قدام شخص آخر، وميقدرش يتخلص من الشعور ده، فيبدأ يحوله بالتدريج إلى موقف عدائي، وبعدها يحاول يدي العداء ده مبرر أخلاقي.. ده بيحتفل بالكريسماس! ده مراته بتطلع في الصور! ده حفيد إليزابيث! ده ما عيطش معانا على غزة! ده ميكانيزم.. آلية، بدل ما نعترف لنفسنا ان فيه شخص أنجح مننا وأكثر قدرة، نبدأ نقنع نفسنا ان النجاح ده ملوش قيمة (ده مش فخر العرب لأنه بتاع كورة والكورة لعبة ومش مهمة) وإن صاحب النجاح مغرور أو منافق أو وصولي.. يعني صلاح ناجح بس احنا أخلاقنا أحسن. نيتشة بيقولك إن الإنسان ممكن يعيد تعريف الفضيلة بطريقة تخليه يشعر بالتفوق، بعدما عجز عن تحقيق التفوق في الواقع. نيتشه ربط الظاهرة دي بفكرته عن «أخلاق العبيد» أو Slave Morality، وهي - في رأيه- طريقة في تكوين الأحكام الأخلاقية بتبدأ من رفض الآخر، مش من تأكيد قيمة الذات. يعني الشخص بدل ما يسأل نفسه: أنا عندي إيه يميزني؟ يبدأ يسأل: إزاي أثبت إن الشخص اللي متفوق عليا ده إنسان سيئ؟ عالم النفس الأمريكي أبراهام تيسر (Abraham Tesser) درس تأثير نجاح الآخرين على تقدير الإنسان لنفسه، ولقا إن نجاح شخص قريب منك في مجال أنت بتعتبره مهم لهويتك ممكن يكون أصعب عليك نفسيًا من نجاح شخص بعيد عنك! بمعنى ان لو محمد صلاح كان كرواتي، ما كانش هيضايقك إطلاقا.. لو ابن المعادي زي مرموش برضه مش هتحس بيه.. بس انه يبقا فلاح من قرية في وسط الدلتا وابن ناس شقيانة زينا وينجح أوي كدة؟ احنا بقا - أصحاب الضغينة المتراكمة - مش هنشوف نفسنا حاسدين أو حاقدين، لأن الصورة دي تجرح احترامنا لنفسنا، وبالتالي عقلنا بيبحث عن مبررات تخلينا نصدق ان عدءانا للولد ده مش نابع من الغيرة: ده نابع من موقف ديني وأخلاقي وسياسي محترم. ودي الدخلة اللي بتتحول فيها الغيرة إلى انتقاد، والانتقاد إلى تشكيك، والتشكيك إلى اتهامات، وكل ده تحت عنوان الدفاع عن الحقيقة أو كشف الناس على حقيقتها. الكارثي هو اننا لا بنمثل ولا بنكذب! احنا فعلا مصدقين الصورة السلبية اللي رسمناها للشاب ده، لأننا لو ما صدقناش مش هنرتاح .. لأننا مش هنقدر نواجه السبب الحقيقي للضغينة. مع الوقت، الضغينة بتتحول إلى طريقة كاملة في التفكير.. أي تصرف عادي من الشخص الآخر يبقى مثير للشك، وأي خطأ صغير يتحول إلى فضيحة أخلاقية، وأي نجاح جديد يصبح دليلًا إضافيًا على غروره أو فساد نواياه. ولكن هذه المعركة العجيبة، رغم كمية الكراهية التي يحظى بها ولدنا صلاح، هي معركة انتصر فيها صلاح!! انتصر لأن الضغينة المتراكمة التي تبدأ من رفض تفوق الولد، لازم تنتهي بنوع من التبعية النفسية ليه.. لأنه حاضر في خاطرنا دايما.. وبنراقبه دايما، وبنبحث عن تفسيرات لصوره وكلامه دايما.. لأننا منحناه مكانة في تفكيرنا أكبر من المكانة اللي كانت مضايقانا أصلا من امتلاكه ليها. منتصر لأنه راكب المفارقة: كل ما تحاول تقلل من قيمته، تكتشف انك بتزود من تأثيره عليك. صاحب الضغينة يا صديقي بيكره إنسان آخر، لمجرد ان وجوده بيفكره انه تافه.