Ilyassharif mughal🇵🇰🇸🇦

"چور مچائے شور" لیڈر برے ہیں یا ہم خود؟ "جیسی عوام، ویسے حکمران: ایک کڑوا سچ جو کوئی نہیں سننا چاہتا" تحریر ✒️ شیخ اعجاز انور ہمارے ملک میں ان دنوں ایک عجیب، سحر انگیز اور رقت آمیز منظر عام ہے۔ صبح کا آغاز ہو یا شام کا اختتام، گلی کی نکڑ ہو یا فیس بک کی دیوار، ہر طرف ایک ہی فلک شگاف نعرہ گونج رہا ہے: "حکومت چور ہے! حکمران ڈاکو ہیں!" مہنگائی کا جن بوتل سے باہر آ جائے تو حکومت چور۔ پٹرول کی قیمتیں بڑھیں تو حکمران ڈاکو۔ آٹا مہنگا ہو تو اوپر والے لٹیرے۔ یہاں تک کہ اگر محلے کے بچے نالائق نکلیں، فیل ہو جائیں یا گھر کی دال گلنے میں وقت لے، تو اس کا ملبہ بھی سیدھا وزیرِ اعظم کے سر پر گرا دیا جاتا ہے۔ سچی بات ہے، یہ نعرے سن کر کبھی کبھی میرا تو ہاؤس نکل جاتا اور میں یہ سوچنے پر مجبور ہو جاتا ہوں کہ یا الٰہی! یہ ہم فرشتوں کی بستی پر اچانک چور کیسے مسلط ہو گئے؟ ہماری عوام اتنی "پاک باز" اور "معصوم" ہے کہ اس کی نیکی کی گواہی پورا خطہ بلکہ سارا عالم دیتا ہے۔ اب اسی پاک باز عوام کے کچھ روزمرہ کے "مقدس" معمولات پر نظر ڈالتے ہیں۔ صبح سویرے جو دودھ والا گلی میں آتا ہے، وہ تو ایک صوفی منش انسان ہے۔ وہ دودھ میں پانی نہیں ملاتا، بلکہ پانی کی بقا کے لیے اس میں تھوڑا سا دودھ شامل کر دیتا ہے تاکہ اس کا رنگ سفید ہو جائے پرچون والا جو آٹا، چینی اور گھی گوداموں میں چھپا کر "مصنوعی قلت" پیدا کرتے ہیں اور پھر غریبوں کو دگنے داموں بیچتے ہیں، وہ چور تھوڑی ہیں؟ وہ تو بس مڈل کلاس کے لیے "بچت سکیم" چلا رہے ہوتے ہیں۔ ذرا آگے چلیے اور سرکاری دفتروں کا چکر لگائیے۔ وہاں بیٹھا ہوا کلرک سے چپڑاسی تک جو صبح نو بجے کی جگہ بارہ بجے دفتر پہنچتا ہے اور دفتر پہنچتے ہی خدا بن جاتا ہے کوئی بھی کام بغیر رشوت نہیں کرتا وہ تو مسجد کے امام ہیں اور ہمارے وہ معمارِ قوم جو نجی اکیڈمیوں میں لاکھوں روپے بٹورنے کے لیے سرکاری اسکولوں اور کالجوں میں "صرف حاضری" لگانے جاتے ہیں وہ تو ولی اللہ ہیں۔ امتحانات کے دنوں میں جو طلبہ بوٹی مافیا کی مدد سے نقل کر کے، یا ممتحن کو پیسے دے کر پوزیشنیں خریدتے ہیں، وہ تو کل کے روشن ستارے ہیں۔ جب یہی ستارے کل کو رشوت دے کر کسی محکمے کے افسر بنتے ہیں، تو سب سے پہلے فیس بک پر سٹیٹس لگاتے ہیں "اس ملک کا نظام چوروں کے ہاتھ میں ہے!" ہمارے ہسپتالوں کے کچھ مسیحا، جو سرکاری ڈیوٹی کے وقت نجی کلینک چمکاتے ہیں اور مریضوں کو مہنگی اور غیر معیاری ادویات لکھ کر فارماسیوٹیکل کمپنیوں سے بیرونِ ملک کے دورے اور تحائف وصول کرتے ہیں، وہ تو انسانیت کے ہمدرد ہیں۔ ہمارے گوشت بیچنے والے قصائی جو پانی لگا کر یا مردہ جانور کا گوشت مرغی کے بھاؤ بیچ دیتے ہیں، وہ تو سراسر نیک روحیں ہیں بجلی چوری کرنے والا ملاوٹ کرنے والا اور جائداد کے کاغذات میں اپنے ہی یتیم بہن بھائیوں کا حق مارنے والا—یہ سب تو معصوم فرشتے ہیں! چور تو صرف وہ ہیں جو اسلام آباد کے ایوانوں میں بیٹھے ہیں۔ قرآنِ پاک کا تو واضح اور اٹل فیصلہ ہے کہ "اور اسی طرح ہم ظالموں میں سے بعض کو بعض پر مسلط کر دیتے ہیں ان کے اعمال کے سبب۔" یعنی جیسی عوام، ویسے ہی حکمران۔ لیکن ہم نے اس آیت کا بھی اپنا ایک "مقامی ترجمہ" نکال لیا ہے۔ ہم سمجھتے ہیں کہ ہم تو بالکل زمزم سے دھلے ہوئے ہیں، بس اوپر والے کہیں اور سے، کسی اور سیارے سے نازل ہو گئے ہیں۔ حقیقت یہ ہے کہ ہمارے معاشرے میں "چور" ہونا اب کوئی جرم نہیں، بلکہ ایک "عہدہ" بن چکا ہے۔ یہاں چھوٹا چور اپنے سے بڑے چور کو حسرت اور غصے سے دیکھتا ہے اور نعرہ لگاتا ہے "حکومت چور ہے!"۔ یہ غصہ اس بات پر نہیں ہوتا کہ ملک لوٹا جا رہا ہے، بلکہ دکھ اس بات کا ہوتا ہے کہ "یا اللہ! جتنا بڑا ہاتھ اس نے مارا، کاش ایسا موقع مجھے بھی مل جاتا!"۔ یہی چھوٹا چور جب شام کو تھک ہار کر گھر آتا ہے، تو اپنے سے چھوٹے چور کو ایمانداری اور دیانت داری پر دو گھنٹے کا طویل اور بورنگ لیکچر دینا نہیں بھولتا۔ ہم ایک ایسے مضحکہ خیز اور منافقانہ دور سے گزر رہے ہیں جہاں ہر شخص دوسرے کی جیب پر نظر رکھے ہوئے ہے، لیکن اخلاقیات کا درس دینے میں سب سے آگے!!! اگر حکمران چور ہیں، تو بھائی! انہیں منتخب کرنے والے، ان کے لیے نعرے مارنے والے، الیکشن کے دنوں میں اپنا ضمیر بیچنے اور اپنی سطح پر ہر چھوٹا بڑا گناہ کرنے والے ہم کون ہیں؟ اگلی بار جب آپ گلی میں یا کسی چائے کے ہوٹل پر کسی کو "حکومت چور ہے" کا نعرہ لگاتے سنیں، تو غصہ ہونے کے بجائے بس ایک گہری مسکراہٹ کے ساتھ چائے کی چسکی لیجیے گا۔ کیونکہ یہاں کوئی ملک کی بقا یا چوری کے خلاف نہیں لڑ رہا، یہاں تو بس ایک چھوٹا چور، اپنے سے بڑے چور کو چور کہہ کر اپنے دل کو تسلی دے رہا ہے کہ: "شکر ہے، میں اکیلا اس گنگا میں ہاتھ نہیں دھو رہا، لائن بہت لمبی ہے!"