🕯

Mbunge wa Tarime Vijijini, Mwita Mwikabe Waitara, amekosoa ufafanuzi uliotolewa na serikali kupitia Waziri wa Habari, Utamaduni, Sanaa na Michezo, Paul Makonda, kuhusiana na gharama za ujenzi wa Uwanja wa Arusha, akisisitiza kuwa Serikali haijatoa majibu ya kuridhisha na mapendekezo ya Bunge kuhusu suala hilo yanasimama palepale. Akizungumza na Jambo TV, Waitara ameeleza kuwa maelezo aliyoyatoa Waziri Makonda hayakuwa majibu ya hoja za ukaguzi zilizowasilishwa na Kamati ya Bunge ya Hesabu za Serikali (PAC), kwani hakueleza jinsi Serikali ilivyoboresha au kujibu hoja za Mdhibiti na Mkaguzi Mkuu wa Hesabu za Serikali (CAG). Waitara amebainisha kuwa kisheria na kikatiba, CAG ndiye jicho la Bunge katika ukaguzi wa fedha za umma. Ameeleza kuwa baada ya CAG kukamilisha ukaguzi na kukabidhi taarifa kwa Rais, ilipelekwa Bungeni ambapo Kamati ya PAC iliwaita wataalamu wa wizarani kujieleza, ikafanya ziara ya ukaguzi eneo la mradi, na hatimaye ikakubaliana na hoja za CAG. "Kwa mujibu wa Sheria jicho la Bunge kwenye ukaguzi wa PESA ni CAG... Kamati ikiwasilisha taarifa Bungeni hiyo inakuwa taarifa ya Bunge, Waziri akikataa taarifa ya Kamati anakuwa amekataa taarifa ya Bunge… ile siyo namna bora ya kujibu hoja za Bunge," amesema Waitara. Waitara ameongeza kuwa Bunge bado halijapata ufafanuzi wa kutosha kuhusu jinsi gharama za mradi huo zilivyopanda kutoka zabuni ya awali iliyotangazwa kupitia mfumo wa NeST hadi kufikia mkataba wa Shilingi bilioni 338, huku akirejea ripoti ya CAG iliyoainisha kuwa kuna fedha zililipwa kwa kazi ambazo hazikufanyika. Pia, Waitara amepinga maelezo yaliyotolewa na Katibu Mkuu wa Wizara hiyo, Gerson Msigwa, pamoja na Waziri Makonda kuwa ongezeko hilo lilisababishwa na maelekezo ya Shirikisho la Soka Afrika (CAF). Akiwa bungeni jijini Dodoma, Waitara alisema endapo Bunge lingekuwa linawajibika ipasavyo, Msigwa na wote waliohusika na mchakato wa matumizi hayo ya fedha kutoka Shilingi bilioni 187 hadi Shilingi bilioni 338 wangekuwa gerezani au kufikishwa mahakamani. Hata hivyo, Waziri Paul Makonda alitetea ujenzi huo akieleza kuwa Uwanja wa Arusha hauwezi kulinganishwa na Uwanja wa Benjamin Mkapa ambao unakabiliwa na changamoto ya kushindwa kuchezwa mvua inaponyesha. Makonda alieleza kuwa gharama za Shilingi bilioni 338 zinajumuisha takribani Shilingi bilioni 52 za kodi (kutoka makadirio ya awali ya Shilingi bilioni 107 yasiyo na kodi) na miundombinu ya kisasa kama vile Sky Boxes 21 na lifti sita, huku akisisitiza kuwa mfumo wa manunuzi wa 'Single Source' ni njia halali kisheria.