آپ کے دشمن نے آپ سے کبھی خوش نہیں ہونا ایک بنیادی بات سمجھ لیں کہ جو آپ کی ذات کا مخالف ہے اس نے آپکی تعریف کبھی نہیں کرنی چاہے آپ چاند تارے ہی توڑ کر کیوں نہ لے آئیں۔ سوشل میڈیا سچ اور جھوٹ کی مارکیٹ ہے ہی نہیں، یہ پسند ناپسند اور دھڑے بندی کی مارکیٹ ہے۔ آپ پٹرول پر سب سڈی دیکھ لیجئے، لیتے بھی جائیں گے اور تنقید بھی کرتے جائیں گے۔ مریم نواز جہاز کے اخراجات نہ دیتیں تب بھی تنقید ہی تھی اور دے دئیے تب بھی اعتراضات ہی ہیں، ریسیونگ کی ڈیٹ اور کلئیر نگ کی ڈیٹ کا پھڈا ہے، اب کیا مریم نواز انہیں منی ٹریل بھی دیں گی کہ ان کے پاس اس ادائیگی کے لئے رقم کہاں سے آئی چاہے وہ ارب پتی والد کی بیٹی ہیں۔ ایک بات یاد رکھیں۔ آپ کے دشمنوں کو آپکی وضاحت کی ضرورت نہیں کیونکہ انہوں نے وہ وضاحت ماننی ہی نہیں اور آپکے دوستوں کو بھی آپکی وضاحت کی ضرورت نہیں کیونکہ وہ آپ پر اعتماد کرتے ہیں اور ہاں اجنبیوں کو بھی وضاحت کی ضرورت نہیں کیونکہ انہیں اس میں دلچسپی ہی نہیں۔ جو لوگ اپنے مخالفین اور دشمنوں کو خوش اور مطمئن کرنے کی کوشش کرتے ہیں وہ کتے کی دم سیدھی کرنے کی کوشش کرتے ہیں، جتنی دیر دم پائپ میں رہتی ہے، سیدھی رہتی ہے، باہر نکلتے ہی ٹیڑھی ہو جاتی ہے۔ تو کرنا کیا چاہیے؟ بہت سادہ بہت آسان۔ وہ کرو جو دل چاہے۔ جس سے اپنے رب اور اپنے ضمیر کے سامنے شرمندگی نہ ہو۔ باقی رہ گئی دنیا تو اسے دنیا کے مالک پر چھوڑ دو۔ وہ راضی ہو گیا تو اس کی کیا مجال؟ اس کی کیا اوقات؟ نجم ولی خان