Umuhinga yigenga

🔴 Itegeko ryo kwiba ifumbire abanyagihugu ryazananye hehe ? Hariho ikintu gitangaje kiriko kiraba hafi mu gihugu cose mu bijanye no gutanga ifumbire. Mu gihe abanyagihugu barihiye 16kg, nka hose hatangwa iyidakwiye. Aho bishitse abanyagihugu bakagumuka, baca bahabwa iyikwiye. Aho abanyagihugu batekereje, batahana iyo idakwiye. None vyagenze gute ngo nka hose humvikanwe kwiba umunyagihugu ? Ni nde yabipanze ? Hama iyo ica iboneka abanyagihugu bagumutse iva hehe ? Ni kubera iki ata rwego na rumwe ruriko ruragenzura ingene abanyagihugu bariko baribwa ? Muri zone Busangana, aho abanyagihugu bagumutse bikomeye ku wambere (26.10.2026), abatware nka bose barapfunzwe, mbere n'uwari ajejwe gutanga ifumbire nawe nyene yaratwawe n'iperereza. Ni kubera iki ivyo vyakozwe muri Busangana yonyene ? Kubera iki abakuru b'amazone yose yatanze ifumbire idakwiye bataciye bafatwa nk'uwo w'i Busangana ? Twoba turi mu ntwaro y'abasuma ? 🔴 Amwe mu mazone tumaze kumenya ubusuma bwabaye : 1. Zone Kigina muri komine Rwibaga mu ntara ya Bujumbura. Abanyagihugu bamenyeshejwe ko bahabwa 11,5 kg baca barayiheba baritahira. Kugeza ubu ntiratangwa. 2. Zone Nyabibondo muri komine Rwibaga : hatanzwe 9kg ku munyagihugu, "naho nyene ushikiriwe washima Imana. Uwuserukira zone Nyabibondo yitwa Vitali yabwiye abanyagihugu ko uwugumuka baca bamujana mu gasho bidatevye. Abantu twaciye dutekana dupfa gutwara utwo tu 9 kg gusa." 3. Zone Kiyenzi muri komine Mugere : hari imitumba nka Ruvumu niyindi baronkejwe 7kg kandi barishe amafaranga ya 16kg. 4. Zone Kibumbwe muri komine Karusi, mu ntara ya Gitega : abanyagihugu bahawe 12,5 kg kandi bari barihiye 16 kg. Kubera ubwoba baremeye batwara iyo, iyindi babwiwe ngo ikamyo ntirashika. 5. Zone Renga ya komine Gitega : hatanzwe 12,5 kg ku munyagihugu kandi yarihiye 16kg. 6. Umunyagihugu wo muri Buhumuza yatwandikiye ati : "twebwe muri Buhumuza, mu mazone nka yose, abanyagihugu babiri basangizwa agafuka ka 25 kg. Ni ukuvuga ku umuntu yahabwa 12,5 kg kandi yaba yarihiye 16 kg. "Twatashe gutyo batatubwiye igihe tuzoronkera iyo yindi." 7. Zone Mutaho muri komine Bugendana, mu ntara ya Gitega : abanyagihugu bahawe ibiro bitangana vy’ifumbire. Bamwe bahawe 16kg, abandi 14kg, abandi 12,5 kg, hariho n’abaronse 10 kg. Abanyagihugu ubusuma babushira canecane kuri DCE Anatole Mbazumutima asanzwe atwara umugambwe CNDD-FDD muri iyo komine, bavuga ko ariwe yahaye itegeko aba chefs de zone ngo batange ibiro bidakwiye. 8. Zone Mbirizi ya komine Matongo, mu ntara ya Butanyerera : hatanzwe 11 kg ku munyagihugu kandi we yaba yarihiye 16kg. 9. Zone Rwabiriro muri komine Ngozi, mu ntara ya Butanyerera : ku wambere abanyagihugu baranse gutora ifumbire idakwiye, "bawutoye ku wakabiri barinze guterwa ubwoba ngo babonye abariko baragumura abanyagihugu". Hatanzwe 12,5 ku munyagihugu. 10. Zone Mwaro muri komine Mwaro, mu ntara ya Gitega : abantu babiri bagabura agafuko ka 25kg, ni ukuvuga ko umuntu yaronka 12,5 kg kandi we yarishe 16 kg. 11. Zone Nyakararo ya komine Mwaro : abanyagihugu babiri basangizwa agafuko ka 25kg, umwe wese agaca atahira 12,5 kg. 12. Umunyagihuguwomurikomine Nyabihanga yanditse ati: "umunyagihugu wese mu kumwandika azoronke ivyo 16kg yabanza gutanga 5000 Fbu. Mw’itangwa bahavuye badukata 2kg umwumwe, ni ukuvugako twatahanye 14kg. Bumvise ivyo vyabaye i Busangana baciye babwira abanyagihugu ko ivyo biro vyasigaye bazobibaha hanyuma. Nyabihanga isanzwe ari komine abantu basanzwe batinya cane kubw'intwaro mbi kandi y’akarenganyo gusumba izindi komine bihana urubibe." 🔴 Ubusuma budasanzwe mu gusubiza amafaranga y’ifumbire y’isizeni riheze ! Hari ubundi busuma bukomeye bwatunganijwe igihugu cose. Ni ubusuma bufatanye n’ingingo y’umushikiranganji Calinie Mbarushimana ivuga ko abari barishe ifumbire yo mw’isizeni riheze bazosubizwa amafaranga yabo. Igitangaje nuko igihe ayo mafaranga yatangwa ama coopec canke amabanki yishikira aho abanyagihugu bari mu mazone n’imitumba kwakira amafaranga yabo. Ariko hageze kuyasubiza, ama coopec n’amabanki vyahawe itegeko ryo kudasubira gusanga abanyagihugu iwabo, ahubwo ko abanyagihugu aribo baja aho izo coopec na banki zikorera. Ikibazo gikomeye gica caduka nuko hariho ahatari hake usanga urugendo abanyagihugu bagira bagiye gutora amafaranga yabo basanga ruzimvye kurusha amafaranga bagiye gutora, bigatuma abanyagihugu bayaheberayo. Kubera iki uko amafaranga yatojwe atariko ariko arasubizwa ? Ikîndi abanyagihugu batubwiye nuko henshi ayo ma coopec n’amabanki atemera ko umunyagihugu atuma uwundi kuja kumutorera ayo mafaranga. Biraboneka ko umengo hariho intumbero yo kunaniza abanyagihugu batari bake kugira bahebereyo amafaranga yabo. Hari ikibazo kitishurwa kugeza ubu : ni abari baheraniwe ifumbire yo mu masizeni y’imbere y’iyiheze, bamwe ugasanga bamaranye imyaka ubutike bwabo. Hari abandi bavuga ko bafise ico bita "jetons" ariko badafise ubutike barihiyeko kuko usanga bwaratojwe mu bindi bihe. Abo bose amafaranga yabo aba ahezeyo. 🔴 Ni nde yateguye buno busuma bwose buboneka mu gihugu cose ? Woba ari umugambwe CNDD-FDD ? Yoba ari umushikiranganji Calinie Mbarushimana ? Yoba ari umukuru wa Leta y’Uburundi, Nestor Ntahontuye ? Yoba ari Prezida Ndayishimiye ? Ico bikoze, ikintu ntigishobora gukorwa co kimwe mu gihugu kidafise aho categuriwe. Harakenewe umuco. Abanyagihugu nibatunganirizwe bahabwe utwabo. #Burundi #ifumbire @GeneralNeva , @NtareHouse , @KwaNtare , @BurundiGov , @FinancesBdi , @MininterInfosBi , @BMineagrie , @FomiBurundi , @nshingamateka ,@Burundi_senat