Сугар-Очирын Мөнхжаргал

Энэ залууг Э.Молор-Эрдэнэ гэнэ. 2019 онд ХААИС-ийн Загас үржүүлэг, технологийн ангийг цор ганцаараа төгсөж байв. Ганцхан элсэгчтэй учраас ангийг нь хаах гэж сургуулиас нь хэд хэд оролдсон ч хүсэлт, өргөдөл гаргасаар байгаад ангиа авч үлдээд зогсохгүй гав ганцаараа энэ мэргэжлээрээ төгсөж байжээ. Багаасаа загасанд нугасгүй хайртай байсан ч цэцэрлэгтээ явах дургүй байв. Харин аав нь аквариумтай загасыг нь гэрээс нь аваад цэцэрлэгт нь аваачиж тавьснаар өглөө бүр ихэд дуртай цэцэрлэг рүүгээ явдаг болсон түүхтэй. Мок гэдэг ник нэртэй энэ залуу одоо МУИС дээр “Зэвэг загасны үржлийн үеийн шилжилт хөдөлгөөн” сэдвээр судалгааны ажлаа хийн мастерын зэргээ хамгаалах гэж буй. Chuluut Tul төсөл дээр Байгалийн загас үржүүлэгчид холбоогоороо 8 жилийн өмнөөс Архангайн Чулуут гол дээр эхэлсэн төслийн хүрээнд 4 сая хадран, зэвэг загас үржүүлэн жарамгай болгон Чулуут голд тавиад байна. Байгаль дээр нэг эм загас жилд 3000 орчим түрс шахдагаас дөнгөж 0.1% нь л нас бие гүйцсэн загас болж амьдардаг ажээ. Байгалийн шалгарал ийм хатуу аж. Харин лабораторийн аргаар үржүүлэг хийн амжилттай жарамгай болгон голд тавих үед энэ магадлал хамгийн багадаа дарай 30% болж өсдөг юм байна. Энэ залуус энэ жилээс эхлэн Булган аймгийн Тэшиг суманд Тавтын голд загас үржүүлэхээр ажиллаж эхэлжээ. 5 сараас эхлээд улаан номд орсон тул загасны үндсэн идэш болох зэвэг, хадран загасны 310 мянган жарамгайгаа өсгөөд тун завгүй ажиллаж байна. Уг нь 750 мянган жарамгай гарах зорилготой байсан ч энэ жил шинэ газар ирж лаборатори энэ тэрээ байгуулаад арай амжсангүй, дараа жилээс шажигнуулна л гэнэ. Энэ хөөрхөн жарамгай нартаа дөнгөж өндөгнөөсөө гарч буй хавчаар хооллон таргалуулан бондойлгож хоёр см болгоод бараг ирэх долоо хоногт Тавтын голд тавьж эх байгальд нь илгээхээр бэлдэж байна. 👏👍🙏 Дараах сайтаар орж үйл ажиллагааны талаар нь дэлгэрэнгүй мэдээлэл авч энэ залуусыг дэмжээрэй! naturalfishbreeders.org chuluuttul.org